ಉಚ್ಚಿಲ ದಸರಾ: ಕಾಪು ಕಡಲತೀರದಲ್ಲಿ ನವದುರ್ಗೆಯರ ಜಲಸ್ಥಂಭನ ಸಂಪನ್ನ

ಉಡುಪಿಯ ಉಚ್ಚಿಲ ಶ್ರೀ ಮಹಾಲಕ್ಷ್ಮೀ ದೇವಸ್ಥಾನದಲ್ಲಿ ಹತ್ತು ದಿನಗಳ ಕಾಲ ನಡೆದ ನವದುರ್ಗೆಯರ ಆರಾಧನೆಯು ಹನ್ನೊಂದನೇ ದಿನದ ಶೋಭಾಯಾತ್ರೆಯೊಂದಿಗೆ ಮುಕ್ತಾಯಗೊಂಡಿತು. ನಾಡೋಜ ಡಾ. ಜಿ. ಶಂಕರ್ ಸೇರಿದಂತೆ ಹಲವು ಗಣ್ಯರು ಭಾಗವಹಿಸಿದ್ದ ಈ ಮೆರವಣಿಗೆಯನ್ನು ಕಾಪು ಕಡಲತೀರಕ್ಕೆ ಕರೆದೊಯ್ಯಲಾಯಿತು. ಅಲ್ಲಿ ಕಾಶಿಯ ಪಂಡಿತರ ನೇತೃತ್ವದಲ್ಲಿ ಗಂಗಾರತಿ ಮತ್ತು ವಿಶೇಷ ಪೂಜೆಗಳನ್ನು ನೆರವೇರಿಸಿ, ಸಮುದ್ರದಲ್ಲಿ ವಿಗ್ರಹಗಳನ್ನು ವಿಸರ್ಜಿಸಲಾಯಿತು. ಈ ವೇಳೆ ಡ್ರೋನ್ ಮೂಲಕ ಪುಷ್ಪವೃಷ್ಟಿ, ಸುಡುಮದ್ದು ಪ್ರದರ್ಶನ ಹಾಗೂ ಬೋಟುಗಳ ವಿದ್ಯುತ್ ದೀಪಾಲಂಕಾರಗಳು ಭಕ್ತರಿಗೆ ವಿಶೇಷ ಅನುಭವ ನೀಡಿದವು.