ಚಿತ್ರದುರ್ಗ: ಯುವಕನಿಗೆ ಬಲವಂತವಾಗಿ ಶಸ್ತ್ರಚಿಕಿತ್ಸೆ ನಡೆಸಿದ ಇಬ್ಬರು ಮಂಗಳಮುಖಿಯರ ಬಂಧನ

ಚಿತ್ರದುರ್ಗ ನಗರದಲ್ಲಿ ಯುವಕನೊಬ್ಬನಿಗೆ ಇಚ್ಛೆಗೆ ವಿರುದ್ಧವಾಗಿ ಗುಪ್ತಾಂಗದ ಶಸ್ತ್ರಚಿಕಿತ್ಸೆ ಮಾಡಿಸಿದ ಆರೋಪದ ಮೇಲೆ ಅನುಷ್ಕಾ ಮತ್ತು ನಳಿನಾ ಎಂಬ ಇಬ್ಬರು ಮಂಗಳಮುಖಿಯರನ್ನು ಪೊಲೀಸರು ಬಂಧಿಸಿದ್ದಾರೆ. ಬುದ್ಧನಗರದ ನಿವಾಸಿಗಳಾದ ಇವರು, ಹೂವು ವ್ಯಾಪಾರಿ ಯುವಕನಿಗೆ ಪರಿಚಿತರಾಗಿ ಈ ಕೃತ್ಯ ಎಸಗಿದ್ದಾರೆ. ಆರೋಪಿಗಳು ಯುವಕನ ತೊಡೆಯ ಮೇಲೆ ಬಿಸಿನೀರು ಮತ್ತು ಕೆಂಡದಿಂದ ಸುಟ್ಟು ಹಿಂಸೆ ನೀಡಿದ್ದಾರೆ ಎಂದು ದೂರಿನಲ್ಲಿ ತಿಳಿಸಲಾಗಿದೆ. ಸಂತ್ರಸ್ತ ಯುವಕನ ತಂದೆ ಅಕ್ಟೋಬರ್ 9 ರಂದು ನೀಡಿದ ದೂರಿನ ಮೇರೆಗೆ ಪರಶುರಾಂಪುರ ಠಾಣೆಯಿಂದ ಪ್ರಕರಣವನ್ನು ಚಿತ್ರದುರ್ಗ ನಗರ ಠಾಣೆಗೆ ವರ್ಗಾಯಿಸಲಾಗಿದ್ದು, ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.