ಬಾಗಲಕೋಟೆಯಲ್ಲಿ ಬರ ಅಧ್ಯಯನ ತಂಡದ ಭೇಟಿ: ಅಧಿಕಾರಿಗಳ ಕಾಲು ಹಿಡಿದು ಕಣ್ಣೀರಿಟ್ಟ ರೈತ!

ನೆಪಮಾತ್ರದ ಸಮೀಕ್ಷೆಗೆ ರೈತರ ಆಕ್ರೋಶ

ಎಲೆ ನೋಡಿ ತೀರ್ಮಾನ ಕೈಗೊಳ್ಳಬೇಡಿ

ಬಾಗಲಕೋಟೆ: ಮಳೆಯ ಅಭಾವದಿಂದ ಭೀಕರ ಸಂಕಷ್ಟಕ್ಕೆ ತುತ್ತಾಗಿರುವ ಬಾಗಲಕೋಟೆ(Bagalkote) ಜಿಲ್ಲೆಯ ವಿವಿಧ ಪ್ರದೇಶಗಳಿಗೆ ಕೇಂದ್ರ ಬರ(Drought) ಅಧ್ಯಯನ ತಂಡ ಇಂದು ಭೇಟಿ ನೀಡಿ, ಒಣಗಿದ ಬೆಳೆಗಳು ಹಾಗೂ ಬರಗಾಲದ ಸ್ಥಿತಿಗತಿಗಳನ್ನು ಖುದ್ದು ಪರಿಶೀಲನೆ ನಡೆಸಿತು.

ಪರಿಶೀಲನಾ ಸಂದರ್ಭದಲ್ಲಿ ರೈತರೊಬ್ಬರು(Farmer) ಕೇಂದ್ರ ಅಧಿಕಾರಿಗಳ ಪಾದಗಳಿಗೆ ಬಿದ್ದು ಕಣ್ಣೀರಿಟ್ಟ ಘಟನೆ ಸಂಭವಿಸಿದರೆ, ಮತ್ತೊಂದು ಕಡೆಯಲ್ಲಿ ಕೇವಲ ಕಣ್ಣೊರೆಸುವ ತಂತ್ರದ ಸಮೀಕ್ಷೆ ನಡೆಸಲಾಗುತ್ತಿದೆ ಎಂದು ಆಕ್ರೋಶಭರಿತರಾದ ರೈತರು ತೀವ್ರ ಅಸಮಾಧಾನ ವ್ಯಕ್ತಪಡಿಸಿದರು.

ಬೆಳೆಗಳ ಸಮೀಕ್ಷೆಗೆ ತೆರಳುವುದಕ್ಕೂ ಮುನ್ನ ಕೇಂದ್ರ ತಂಡವು ಜಿಲ್ಲಾಧಿಕಾರಿಗಳ ಕಚೇರಿಯ ಸಭಾಂಗಣದಲ್ಲಿ ಅಧಿಕಾರಿಗಳೊಂದಿಗೆ ಸಭೆ ನಡೆಸಿತು. ಜಿಲ್ಲಾಧಿಕಾರಿ ಸಂಗಪ್ಪ, ಜಿಲ್ಲಾ ಪಂಚಾಯಿತಿ ಸಿಇಒ ಗಜಾನನ ಬಾಲೆ ಹಾಗೂ ಕೃಷಿ, ತೋಟಗಾರಿಕೆ ಮತ್ತು ನೀರಾವರಿ ಇಲಾಖೆಯ ಹಿರಿಯ ಅಧಿಕಾರಿಗಳು ಈ ಸಭೆಯಲ್ಲಿ ಉಪಸ್ಥಿತರಿದ್ದರು. ಜಿಲ್ಲೆಯಲ್ಲಿನ ಮಳೆಯ ಕೊರತೆ, ಬೆಳೆ ಹಾನಿ ಮತ್ತು ಕುಡಿಯುವ ನೀರಿನ ಸಮಸ್ಯೆಗಳ ಕುರಿತಾದ ಸಮಗ್ರ ವರದಿಯನ್ನು ಅಧಿಕಾರಿಗಳಿಂದ ಪಡೆದ ನಂತರ ಕೇಂದ್ರ ತಂಡವು ಸ್ಥಳ ಪರಿಶೀಲನೆಗೆ ಪ್ರಯಾಣ ಬೆಳೆಸಿತು.

ಪಾಟ್ನಾದ ಅಕ್ಕಿ ನಿರ್ದೇಶನಾಲಯದ ನಿರ್ದೇಶಕ ಡಾ. ಮಾನಸಿಂಗ್ ನೇತೃತ್ವದ ಮೂವರು ಸದಸ್ಯರ ಈ ತಂಡದಲ್ಲಿ ದೆಹಲಿಯ ವೆಚ್ಚ ಇಲಾಖೆಯ ಅಧೀನ ಕಾರ್ಯದರ್ಶಿ ಪಾರ್ಥ ಪೌಲ್ ಹಾಗೂ ಗ್ರಾಮೀಣಾಭಿವೃದ್ಧಿ ಇಲಾಖೆಯ ಅಧೀನ ಕಾರ್ಯದರ್ಶಿ ರಾಕೇಶ್ ಕುಮಾರ್ ಇದ್ದರು. ಪರಿಶೀಲನೆಯ ವೇಳೆ ಜಿಲ್ಲಾ ಉಸ್ತುವಾರಿ ಸಚಿವ ವಿಜಯಾನಂದ ಕಾಶಪ್ಪನವರ, ಜಿಲ್ಲಾಧಿಕಾರಿ ಸಂಗಪ್ಪ, ಜಿಲ್ಲೆಯ ಸಂಸದರು, ಶಾಸಕರು ಹಾಗೂ ಕೃಷಿ-ತೋಟಗಾರಿಕೆ ಇಲಾಖೆಯ ಅಧಿಕಾರಿಗಳು ಜೊತೆಗಿದ್ದರು.

ಬೆಳಗ್ಗೆ 8:30ಕ್ಕೆ ಗುಳೇದಗುಡ್ಡ ತಾಲೂಕಿನ ಹಳದೂರು ಗ್ರಾಮಕ್ಕೆ ತೆರಳಿದ ತಂಡ, ಹುಸೇನಬಿ ಡಾಲಾಯತ್ ಎಂಬ ರೈತ ಮಹಿಳೆಯ ಜಮೀನಿನಲ್ಲಿ ಮಳೆಯಿಲ್ಲದೆ ಸಂಪೂರ್ಣವಾಗಿ ಬಾಡಿಹೋಗಿದ್ದ ಮೆಕ್ಕೆಜೋಳದ ಬೆಳೆಯನ್ನು ವೀಕ್ಷಿಸಿತು. ಈ ವೇಳೆ ರೈತರು ತಮಗೆ ಸಂಭವಿಸಿದ ನಷ್ಟವನ್ನು ವಿವರಿಸಿ ಪರಿಹಾರ ನೀಡುವಂತೆ ಕೋರಿದರು.

ಶಿರೂರಿನಲ್ಲಿ ರುದ್ರಪ್ಪ ಗಾಣಿಗೇರ ಅವರ ಒಣಗುತ್ತಿರುವ ಕಬ್ಬಿನ ಗದ್ದೆ ಹಾಗೂ ಬಸಯ್ಯ ಲಂಗಟದ ಅವರ ಮೆಕ್ಕೆಜೋಳದ ಬೆಳೆಯನ್ನು ತಂಡ ಪರಿಶೀಲಿಸಿತು. ನಂದಪ್ಪ ಗುಳೇದ ಅವರ ಮೆಕ್ಕೆಜೋಳ, ಮಹಾಂತೇಶ್ ಗುಳೇದ ಅವರ ಈರುಳ್ಳಿ ಬೆಳೆ ಹಾಗೂ ಭಗವತಿ ಕ್ರಾಸ್ ವ್ಯಾಪ್ತಿಯಲ್ಲಿ ಸೂರ್ಯಕಾಂತಿ ಮತ್ತು ತೊಗರಿ ಬೆಳೆಗಳಿಗೆ ಉಂಟಾದ ಹಾನಿಯನ್ನು ವೀಕ್ಷಿಸಲಾಯಿತು.

ಬೇವೂರು ಗ್ರಾಮದಲ್ಲಿ ತೊಗರಿ ಬೆಳೆಯನ್ನು ವೀಕ್ಷಿಸಿದ ತಂಡ, ನಂತರ ಹುನಗುಂದ ತಾಲೂಕಿನ ಅಮರಾವತಿ, ಇಳಕಲ್ ತಾಲೂಕಿನ ಚಿಕ್ಕಕೊಡಗಲಿ ಹಾಗೂ ಗುಗ್ಗಲಮರಿ ಕ್ರಾಸ್ ವ್ಯಾಪ್ತಿಯ ಬರಪೀಡಿತ ಹೊಲಗಳಿಗೆ ಭೇಟಿ ನೀಡಿತು.

ಕಾಲಿಗೆ ಬಿದ್ದ ರೈತ!

ಬಾಗಲಕೋಟೆ ತಾಲೂಕಿನ ಭಗವತಿ ಗ್ರಾಮದಲ್ಲಿ ಈರುಳ್ಳಿ ಗದ್ದೆಯನ್ನು ವೀಕ್ಷಿಸುವಾಗ ಮನಕಲಕುವ ಸನ್ನಿವೇಶವೊಂದು ನಡೆಯಿತು. ಬೆಳೆ ಸಂಪೂರ್ಣ ನಾಶವಾಗಿ ಕಂಗಾಲಾಗಿದ್ದ ರೈತ ಶಂಕ್ರಪ್ಪ ಗೌಡರ್ ಕೇಂದ್ರ ಬರ ಅಧ್ಯಯನ ಅಧಿಕಾರಿಗಳ ಕಾಲಿಗೆ ಬಿದ್ದು ಪರಿಹಾರಕ್ಕಾಗಿ ಗೋಗರೆದರು. ಕೂಡಲೇ ಸ್ಥಳೀಯ ಅಧಿಕಾರಿಗಳು ರೈತನನ್ನು ಮೇಲಕ್ಕೆತ್ತಿದರು. ನಮ್ಮ ಹೊಲದಲ್ಲಿದ್ದ ಬೆಳೆಗಳೆಲ್ಲವೂ ಹಾಳಾಗಿವೆ. ಕೈಯಲ್ಲಿದ್ದ ಹಣವೆಲ್ಲವೂ ನಷ್ಟವಾಗಿದೆ. ಸಂಕಷ್ಟವನ್ನು ಸಹಿಸಲಾಗದೆ ಅಧಿಕಾರಿಗಳ ಕಾಲು ಹಿಡಿದು ಬೇಡಿಕೊಂಡೆ ಎಂದು ಅವರು ಕಣ್ಣೀರಿಟ್ಟರು. ಇದನ್ನೂ ಓದಿ: ಚಾ.ನಗರ ಜಿಲ್ಲೆಗೆ ಕೇಂದ್ರ ಬರ ಅಧ್ಯಯನ ತಂಡ ಭೇಟಿ, ಪರಿಶೀಲನೆ

ಎಲೆ ನೋಡಬೇಡಿ, ಗಡ್ಡೆ ನೋಡಿ:

ಕೇಂದ್ರ ತಂಡದ ಕಾರ್ಯವೈಖರಿಯ ವಿರುದ್ಧ ರೈತರು ತೀವ್ರ ಆಕ್ರೋಶ ವ್ಯಕ್ತಪಡಿಸಿದರು. ರಸ್ತೆ ಬದಿಯಲ್ಲಿ ನಿಂತು, ಹೊಲದ ಯಾವುದೋ ಒಂದು ಮೂಲೆಯಲ್ಲಿ ಕೆಲವೇ ಹೊಲಗಳನ್ನು ನೋಡಿದರೆ ಬರದ ನೈಜ ಸ್ಥಿತಿ ಹೇಗೆ ತಿಳಿಯುತ್ತದೆ? ತಂಡವು ಒಳಭಾಗದ ಹಳ್ಳಿಗಳಿಗೂ ತೆರಳಿ ಪರಿಶೀಲನೆ ನಡೆಸಬೇಕು ಎಂದು ರೈತರು ಒತ್ತಾಯಿಸಿದರು.

ಮೇಲ್ನೋಟಕ್ಕೆ ಈರುಳ್ಳಿ ಎಲೆಗಳು ಹಸಿರಾಗಿ ಕಾಣಿಸುತ್ತಿವೆ ಎಂದು ಅಧಿಕಾರಿಗಳು ಹೇಳುತ್ತಿದ್ದಾರೆ. ಆದರೆ ನೆಲದೊಳಗೆ ನೀರಿನ ಕೊರತೆಯಿಂದ ಗಡ್ಡೆಯೇ ಕಟ್ಟಿಲ್ಲ. ಎಲೆ ನೋಡಿ ತೀರ್ಮಾನ ಕೈಗೊಳ್ಳಬೇಡಿ, ವಾಸ್ತವವನ್ನು ನೋಡಿ ಸೂಕ್ತ ವರದಿ ನೀಡಿ ಎಂದು ರೈತರು ತರಾಟೆಗೆ ತೆಗೆದುಕೊಂಡರು.

ನಾವು ಎಕರೆಗೆ 40 ರಿಂದ 50 ಸಾವಿರ ರೂಪಾಯಿ ಸಾಲ ಮಾಡಿ ಖರ್ಚು ಮಾಡಿದ್ದೇವೆ. ಎಲ್ಲವೂ ಮಣ್ಣುಪಾಲಾಗಿದೆ. ಇದೀಗ ಹಿಂಗಾರು ಬಿತ್ತನೆ ಸಮಯ ಆರಂಭವಾಗಿದ್ದು, ರೈತರ ಬಳಿ ಹಣವಿಲ್ಲ. ಸರ್ಕಾರ ತಕ್ಷಣವೇ ಎಕರೆಗೆ ಕನಿಷ್ಠ 1 ಲಕ್ಷ ರೂ. ಪರಿಹಾರ ನೀಡಬೇಕು. ಆಗ ಮಾತ್ರ ನಾವು ಹಿಂಗಾರು ಬಿತ್ತನೆ ಮಾಡಲು ಸಾಧ್ಯ ಎಂದು ರೈತರು ಸರ್ಕಾರಕ್ಕೆ ಒಕ್ಕೊರಲಿನಿಂದ ಆಗ್ರಹಿಸಿದರು.