ಉಡುಪಿ: ಕೊಡಂಕೂರು ಪುತ್ತೂರಿನ ಎರಡು ಮನೆಗಳ ಬಾಗಿಲು ಒಡೆದು 50,000 ರೂ. ಕಳವು

ಉಡುಪಿಯ ಕೊಡಂಕೂರು ಪುತ್ತೂರಿನಲ್ಲಿರುವ ಎರಡು ಮನೆಗಳ ಬಾಗಿಲು ಒಡೆದು ಒಟ್ಟು 50,000 ರೂಪಾಯಿ ನಗದು ಕಳವಾಗಿರುವ ಬಗ್ಗೆ ಉಡುಪಿ ನಗರ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದೆ. ಪಿ. ಸುಂದರ ಎಂಬುವವರು ನೀಡಿದ ದೂರಿನ ಮೇರೆಗೆ ಈ ಪ್ರಕರಣ ದಾಖಲಾಗಿದೆ.

ದೂರಿನ ಪ್ರಕಾರ, ಸುಂದರ ಅವರು ನವೆಂಬರ್ 10ರಂದು ಮನೆಗೆ ಬೀಗ ಹಾಕಿ ಕೆಲಸದ ನಿಮಿತ್ತ ಉಡುಪಿಗೆ ತೆರಳಿದ್ದರು. ಅವರ ಕುಟುಂಬಸ್ಥರು ಸುರತ್ಕಲ್‌ನಲ್ಲಿರುವ ತವರುಮನೆಗೆ ಹೋಗಿದ್ದರಿಂದ, ಸುಂದರ ಅವರು ಕೆಲಸ ಮುಗಿಸಿ ಅಂದೇ ರಾತ್ರಿ ಸುರತ್ಕಲ್‌ಗೆ ತೆರಳಿದ್ದರು.

ನವೆಂಬರ್ 11ರ ರಾತ್ರಿ 8 ಗಂಟೆ ಸುಮಾರಿಗೆ ಸುಂದರ ಅವರ ಅಣ್ಣ ಶಂಕರ್ ಅವರು ಕರೆ ಮಾಡಿ, ಮನೆಯ ಬಾಗಿಲು ಒಡೆದಿರುವ ವಿಷಯವನ್ನು ತಿಳಿಸಿದ್ದಾರೆ. ತಕ್ಷಣ ಸ್ಥಳಕ್ಕೆ ಬಂದು ಪರಿಶೀಲಿಸಿದಾಗ, ಯಾರೋ ಅಪರಿಚಿತರು ಪಿಕ್ಕಾಸಿನಿಂದ ಮನೆಯ ಮುಖ್ಯ ಬಾಗಿಲು ಮತ್ತು ಬೆಡ್ ರೂಂನಲ್ಲಿದ್ದ ಗೋದ್ರೇಜ್ ಕಪಾಟನ್ನು ಒಡೆದು ಅದರಲ್ಲಿದ್ದ 20,000 ರೂಪಾಯಿ ನಗದನ್ನು ಕಳವು ಮಾಡಿರುವುದು ಕಂಡುಬಂದಿದೆ.

ಅದೇ ಅವಧಿಯಲ್ಲಿ, ಸುಂದರ ಅವರ ಮನೆಯ ಆವರಣದಲ್ಲಿದ್ದ ಬಾಡಿಗೆದಾರ ಚಂದ್ರ ಅವರ ಮನೆಯ ಬಾಗಿಲನ್ನು ಕೂಡ ಕಳ್ಳರು ಒಡೆದಿದ್ದಾರೆ. ಚಂದ್ರ ಅವರ ಮನೆಯ ಟ್ರಂಕ್‌ನಲ್ಲಿದ್ದ 30,000 ರೂಪಾಯಿ ನಗದನ್ನು ಕಳ್ಳರು ದೋಚಿದ್ದಾರೆ ಎಂದು ದೂರಿನಲ್ಲಿ ತಿಳಿಸಲಾಗಿದೆ.

ನವೆಂಬರ್ 10ರ ರಾತ್ರಿ 8 ಗಂಟೆಯಿಂದ ನವೆಂಬರ್ 11ರ ರಾತ್ರಿ 8 ಗಂಟೆಯ ಅವಧಿಯಲ್ಲಿ ಈ ಕೃತ್ಯ ನಡೆದಿದೆ ಎಂದು ದೂರಿನಲ್ಲಿ ಉಲ್ಲೇಖಿಸಲಾಗಿದೆ.

ಈ ಸಂಬಂಧ ಉಡುಪಿ ನಗರ ಪೊಲೀಸ್ ಠಾಣೆಯಲ್ಲಿ ಕ್ರೈಂ ನಂ: 153/2026, ಬಿಎನ್‌ಎಸ್ ಸೆಕ್ಷನ್ 331(3), 331(4) ಮತ್ತು 305ರ ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ.

ತನಿಖೆಯ ನಂತರ ಹೆಚ್ಚಿನ ಮಾಹಿತಿ ಲಭ್ಯವಾಗಲಿದೆ.

ಉಡುಪಿ ನಗರ ಪೊಲೀಸ್ ಠಾಣೆ