ಹಿರಿಯಡ್ಕ: ಯಕ್ಷಗಾನ ಕಲಾವಿದರ ಮನೆಯಿಂದ ₹25,000 ಮೌಲ್ಯದ ರಾಜ್ಯೋತ್ಸವ ಪ್ರಶಸ್ತಿ ಫಲಕ ಕಳವು

ಹಿರಿಯಡ್ಕದ ಸುಜಾತ ಕುಲಾಲ ಅವರ ಬಾಡಿಗೆ ಮನೆಯಲ್ಲಿ ವಾಸವಿರುವ ಯಕ್ಷಗಾನ ಕಲಾವಿದ ಸಿ. ಮಂಜುನಾಥ ಪ್ರಭು ಅವರ ಮನೆಯಿಂದ ಸರ್ಕಾರ ನೀಡಿದ್ದ ಸುವರ್ಣ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಫಲಕ ಕಳುವಾಗಿರುವ ಬಗ್ಗೆ ದೂರು ದಾಖಲಾಗಿದೆ.

ದೂರಿನ ಪ್ರಕಾರ, ಸರ್ಕಾರವು 2024ರ ನವೆಂಬರ್ 1ರಂದು ಮಂಜುನಾಥ ಪ್ರಭು ಅವರಿಗೆ ಪ್ರಶಸ್ತಿ ಫಲಕವನ್ನು ನೀಡಿ ಗೌರವಿಸಿತ್ತು. ಅವರು ಈ ಪ್ರಶಸ್ತಿ ಫಲಕವನ್ನು ಒಂದು ಕೈಚೀಲದಲ್ಲಿ ಇಟ್ಟುಕೊಂಡು ಮಲಗುತ್ತಿದ್ದರು ಎಂದು ತಿಳಿಸಲಾಗಿದೆ.

ದಿನಾಂಕ 20-09-2026ರಂದು ಪ್ರಶಸ್ತಿ ಫಲಕವನ್ನು ನೋಡಿ ಪುನಃ ಅದೇ ಚೀಲದಲ್ಲಿ ಇರಿಸಿದ್ದರು. ಬಳಿಕ ದಿನಾಂಕ 15-10-2026ರಂದು ಬೆಳಿಗ್ಗೆ 10:00 ಗಂಟೆ ಸುಮಾರಿಗೆ ಯಕ್ಷಗಾನದ ಸಾಮಗ್ರಿ ಹಾಗೂ ಬಟ್ಟೆಗಳನ್ನು ಸರಿಪಡಿಸಲು ಹೋದಾಗ ಪ್ರಶಸ್ತಿ ಫಲಕ ಕಾಣೆಯಾಗಿರುವುದು ಗಮನಕ್ಕೆ ಬಂದಿದೆ ಎಂದು ದೂರಿನಲ್ಲಿ ಉಲ್ಲೇಖಿಸಲಾಗಿದೆ.

ಪ್ರಶಸ್ತಿ ಫಲಕದಲ್ಲಿ ಬಂಗಾರದ ಲೇಪನದ ಪ್ಲೇಟ್ ಇದ್ದು, ಅದರ ಅಂದಾಜು ಮೌಲ್ಯ ರೂ. 25,000 ಇರಬಹುದು ಎಂದು ಅಂದಾಜಿಸಲಾಗಿದೆ. ಯಾರೋ ಕಳ್ಳರು ಪ್ರಶಸ್ತಿ ಫಲಕವನ್ನು ಕಳವು ಮಾಡಿಕೊಂಡು ಹೋಗಿದ್ದಾರೆ ಎಂದು ದೂರಿನಲ್ಲಿ ತಿಳಿಸಲಾಗಿದೆ.

ಈ ಸಂಬಂಧ ಹಿರಿಯಡ್ಕ ಪೊಲೀಸ್ ಠಾಣೆಯಲ್ಲಿ ಅಪರಾಧ ಕ್ರಮಾಂಕ 64/2026, ಬಿಎನ್‌ಎಸ್ ಸೆಕ್ಷನ್ 305(a) ಅಡಿಯಲ್ಲಿ ಪ್ರಕರಣ ದಾಖಲಾಗಿದೆ.

ತನಿಖೆಯ ನಂತರವಷ್ಟೇ ಹೆಚ್ಚಿನ ಮಾಹಿತಿ ತಿಳಿಯಲಿದೆ.

ಅಪರಾಧ ಕ್ರಮಾಂಕ 64/2026