ಅಮೆರಿಕದಲ್ಲಿ ಬಡ್ಡಿ ದರ ಕಡಿತದ ಪರಿಣಾಮ ಭಾರತಕ್ಕೆ ಹೆಚ್ಚು ವಿದೇಶಿ ನಿಧಿಯ ಒಳಹರಿವು ನಿರೀಕ್ಷೆ

ವಾಷಿಂಗ್ಟನ್‌ : ಫೆಡರಲ್‌ ರಿಸರ್ವ್‌ನಿಂದ ಸತತ 3ನೇ ಬಾರಿ ಬಡ್ಡಿ ದರ ಇಳಿಕೆ ಇದರಿಂದ ಭಾರತಕ್ಕೆ ಹೆಚ್ಚು ವಿದೇಶಿ ನಿಧಿಯ ಒಳಹರಿವು ನಿರೀಕ್ಷೆ ಹೂಡಿಕೆದಾರರಲ್ಲಿ ಈಗಾಗಲೇ ಹೆಚ್ಚಿದ ಆಶಾವಾದ ಜೆರೋಮ್‌ ಪೊವೆಲ್‌ ಬಡ್ಡಿ ದರ ಕಡಿತದ ಘೋಷಣೆ ಮಾಡಿದ್ದಾರೆ.

ಅಮೆರಿಕದ ಕೇಂದ್ರೀಯ ಬ್ಯಾಂಕ್‌ ಆಗಿರುವ ಫೆಡರಲ್‌ ರಿಸರ್ವ್‌ ಬಡ್ಡಿ ದರವನ್ನು ಸತತ ಮೂರನೇ ಬಾರಿ ಇಳಿಸಿದೆ. ಬಡ್ಡಿ ದರವನ್ನು ಗುರುವಾರ ಶೇ. 0.25ರಷ್ಟು ಇಳಿಸಿದ್ದು, ಅಲ್ಲಿ ಈಗ ಬಡ್ಡಿದರ ಪ್ರಮಾಣ ಶೇ. 3.50ರಿಂದ ಶೇ. 3.75ರಷ್ಟಿದೆ.

”ಹಣದುಬ್ಬರ ನಿಯಂತ್ರಣಕ್ಕೆ ಬರುತ್ತಿರುವ ಹಿನ್ನೆಲೆಯಲ್ಲಿ ಬಡ್ಡಿ ದರ ಇಳಿಸಲಾಗಿದೆ,” ಎಂದು ಫೆಡರಲ್‌ ರಿಸರ್ವ್‌ ಅಧ್ಯಕ್ಷ ಜೆರೋಮ್‌ ಪೊವೆಲ್‌ ಹೇಳಿದ್ದಾರೆ. ಇದರ ಬೆನ್ನಲ್ಲಿಯೇ, ದೇಶದಲ್ಲಿ ನಿರುದ್ಯೋಗ ನಿಯಂತ್ರಣದಲ್ಲಿಲ್ಲ ಎಂದೂ ಕಳವಳ ವ್ಯಕ್ತಪಡಿಸಿದ್ದಾರೆ.

”ಅಮೆರಿಕದ ಆರ್ಥಿಕತೆಗೆ ಬೆಂಬಲ ನೀಡಲು ಮತ್ತು ಉದ್ಯೋಗ ಸೃಷ್ಟಿಗೆ ಒತ್ತು ನೀಡಲು ಬಡ್ಡಿ ದರ ಇಳಿಸುವುದು ಅನಿವಾರ್ಯವಾಗಿತ್ತು,” ಎಂದಿದ್ದಾರೆ. ಮುಂದಿನ ವರ್ಷವೂ 2026ರಲ್ಲೂ ಬಡ್ಡಿ ದರ ಕಡಿತ ಆಗಬಹುದು ಎಂದು ಆರ್ಥಿಕ ತಜ್ಞರು ನಿರೀಕ್ಷಿಸಿದ್ದಾರೆ.

ಈಗ ಹಣದುಬ್ಬರ ಕಡಿಮೆ ಮಾಡುವುದರ ಜೊತೆಗೆ ನಿರುದ್ಯೋಗ ಸಮಸ್ಯೆ ನಿವಾರಣೆ ಮಾಡುವುದು ಅಮೆರಿಕದ ಫೆಡರಲ್‌ ರಿಸರ್ವ್‌ ಮುಂದಿರುವ ಸವಾಲು. ಬಡ್ಡಿ ದರ ಎಫೆಕ್ಟ್? ಬಡ್ಡಿ ದರ ಇಳಿದರೆ ದೊಡ್ಡದೊಡ್ಡ ಕಂಪನಿಗಳು ತೆಗೆದುಕೊಳ್ಳುವ ಸಾಲದ ಮೇಲೆ ಬಡ್ಡಿ ಇಳಿಯುತ್ತದೆ. ಬಡ್ಡಿ ವೆಚ್ಚ ಕಡಿಮೆಯಾಗುವುದರಿಂದ ಕಂಪನಿಗಳು ಉತ್ಪಾದನೆಯನ್ನು ಹೆಚ್ಚಿಸಲು ಒತ್ತು ನೀಡುತ್ತವೆ.

ಆಗ ಹೆಚ್ಚಿನ ಉದ್ಯೋಗ ಸೃಷ್ಟಿಯಾಗುತ್ತದೆ. ಮಾರುಕಟ್ಟೆಯಲ್ಲಿ ಹಣದ ಹರಿವು ಹೆಚ್ಚುವುದರಿಂದ ಆರ್ಥಿಕತೆಗೆ ಬಲ ಸಿಗುತ್ತದೆ. ಮುಂದಿನ ವರ್ಷ ಜೆರೋಮ್‌ ಪೊವೆಲ್‌ ಅಧಿಕಾರಾವಧಿ ಮುಕ್ತಾಯಗೊಳ್ಳುತ್ತದೆ. ಅವರ ಉತ್ತರಾಧಿಕಾರಿ ಯಾರು ಎಂಬುದರ ಆಧಾರದ ಮೇಲೆ ಫೆಡರಲ್‌ ರಿಸರ್ವ್‌ ನೀತಿಗಳ ಸ್ವರೂಪ ಗೊತ್ತಾಗುತ್ತದೆ.

ಬಡ್ಡಿ ದರ ಕಡಿತದ ಕುರಿತು ಫೆಡರಲ್‌ ಓಪನ್‌ ಮಾರ್ಕೆಟ್‌ ಕಮಿಟಿ (ಎಫ್‌ಒಎಂಸಿ)ಯ 19 ಸದಸ್ಯರು ಏಕಾಭಿಪ್ರಾಯವನ್ನು ವ್ಯಕ್ತಪಡಿಸಿಲ್ಲ. ಮುಂದಿನ ದಿನಗಳಲ್ಲಿ ಮತ್ತಷ್ಟು ಕಡಿತವಾಗಲಿದೆ ಎಂದು 8 ಸದಸ್ಯರು ಭವಿಷ್ಯ ನುಡಿದಿದ್ದಾರೆ. ಭಾರತದ ಮೇಲೇನು ಪರಿಣಾಮ? ಅಮೆರಿಕದ ಫೆಡರಲ್‌ ಬ್ಯಾಂಕ್‌ ನೀತಿಗಳಿಗೆ ವಿರುದ್ಧವಾಗಿ ಭಾರತೀಯ ರಿಸರ್ವ್‌ ಬ್ಯಾಂಕ್‌ ಯಾವತ್ತಿಗೂ ನಡೆದುಕೊಂಡಿಲ್ಲ. ಬಹಳಷ್ಟು ಸಂದರ್ಭಗಳಲ್ಲಿ ಫೆಡರಲ್‌ ರಿಸರ್ವ್‌ ಬಡ್ಡಿ ದರ ಇಳಿಸಿದಾಗ ಆರ್‌ಬಿಐ ಕೂಡ ಅದನ್ನೇ ಅನುಸರಿಸಿದ ನಿದರ್ಶನಗಳಿವೆ.

ಈ ರೀತಿಯ ಬೆಳವಣಿಗೆಗಳು ಹತ್ತಾರು ಬಾರಿ ಮರುಕಳಿಸಿವೆ. 1990ರಲ್ಲಿ ಫೆಡರಲ್‌ ಬ್ಯಾಂಕ್‌ ಬಡ್ಡಿ ದರ ಕಡಿತಗೊಳಿಸಿದಾಗ, 2010-14ರ ಅವಧಿಯಲ್ಲಿ ಬಡ್ಡಿದರ ಹೆಚ್ಚಳ ಮಾಡಿದಾಗ ರಿಸರ್ವ್‌ ಬ್ಯಾಂಕ್‌ ಕೂಡ ಹಾಗೆಯೇ ಮಾಡಿದೆ. ಇನ್ನು, ಅಮೆರಿಕದಲ್ಲಿ ಬಡ್ಡಿ ದರ ಕಡಿತದ ಪರಿಣಾಮ ಭಾರತಕ್ಕೆ ಹೆಚ್ಚು ವಿದೇಶಿ ನಿಧಿಯ ಒಳಹರಿವು ನಿರೀಕ್ಷೆ ಇದೆ.

ಇದರ ಸುಳಿವು ಈಗಾಗಲೇ ಷೇರುಪೇಟೆಯಲ್ಲಿ ಕಂಡುಬಂದಿದೆ. ಪೊವೆಲ್‌ಗಿತ್ತು ಒತ್ತಡ ವೇತನ ವಿಧೇಯಕಕ್ಕೆ ಅನುಮೋದನೆ ಸಿಗದೆ ಅಮೆರಿಕದ ಆಡಳಿತ ಯಂತ್ರ 43 ದಿನಗಳ ಕಾಲ ನಿಷ್ಕ್ರಿಯವಾಗಿತ್ತು. ವೇತನ ಪಾವತಿ ನಿಲುಗಡೆಯಾಗಿತ್ತು. ಹೀಗಾಗಿ ಫೆಡರಲ್‌ ರಿಸರ್ವ್‌ಗೆ ಅಗತ್ಯವಾಗಿದ್ದ ದತ್ತಾಂಶಗಳು ಸಿಗಲಿಲ್ಲ. ಆದರೆ ಬಡ್ಡಿ ದರ ಕಡಿತಕ್ಕೆ ಟ್ರಂಪ್‌ ಆಡಳಿತ ಭಾರಿ ಒತ್ತಡ ಹೇರಿತ್ತು.

ಸೆಪ್ಟೆಂಬರ್‌ನಲ್ಲಿ ಬಡ್ಡಿ ಕಡಿತ ಮಾಡಿದಾಗ ಡಿಸೆಂಬರ್‌ನಲ್ಲಿ ಮತ್ತೆ ಬಡ್ಡಿ ದರ ಇಳಿಯುವ ನಿರೀಕ್ಷೆ ಇರಿಸಿಕೊಳ್ಳಬೇಡಿ ಎಂದಿದ್ದ ಜೆರೋಮ್‌ ಪೊವೆಲ್‌ ತಮ್ಮ ನಿಲುವು ಬದಲಿಸಿದ್ದಾರೆ. ಡೊನಾಲ್ಡ್‌ ಟ್ರಂಪ್‌ ಎರಡನೇ ಬಾರಿ ಅಧಿಕಾರಕ್ಕೆ ಬಂದಾಗಿನಿಂದ ಬಡ್ಡಿ ದರ ಇಳಿಸುವ ವಿಚಾರದಲ್ಲಿ ಜೆರೋಮ್‌ ಪೊವೆಲ್‌ ಅವರೊಂದಿಗೆ ನಿರಂತರವಾಗಿ ಸಂಘರ್ಷವಿತ್ತು.

ಈಗ ಫೆಡರಲ್‌ ರಿಸರ್ವ್ ತೆಗೆದುಕೊಂಡಿರುವ ನಿರ್ಣಯವು ಮಾರುಕಟ್ಟೆ ನಿರೀಕ್ಷೆಗಳಿಗೆ ಅನುಗುಣವಾಗಿತ್ತು. ಆದರೆ ಮುಂದಿನ ವರ್ಷ ಹಣದುಬ್ಬರ ಮತ್ತು ನಿರುದ್ಯೋಗ ಕಡಿಮೆಯಾದರೆ ಮಾತ್ರವೇ ಇಂತಹ ಸಾಧ್ಯತೆ ಇರುತ್ತದೆ ಎಂದು ಹಣಕಾಸು ತಜ್ಞರು ಹೇಳಿದ್ದಾರೆ. 3.75% – 4.00%: ಮೊದಲು ಇದ್ದ ಬಡ್ಡಿ ದರ 3.50%-3.75%: ಇಳಿಕೆ ನಂತರದ ಬಡ್ಡಿ ದರ”