ಪಿಎಂ ಇ-ಡ್ರೈವ್‌ ಯೋಜನೆ : ವಿದ್ಯುತ್ ವಾಹನವನ್ನು ಖರೀದಿಸುವ ಪ್ರಕ್ರಿಯೆಯನ್ನು ಸುಲಭ ಮತ್ತು ತ್ವರಿತಗೊಳಿಸಲು ಡಿಜಿಟಲ್ ವೋಚರ್ ಅನ್ನು ವಿನ್ಯಾಸಿಕರಣ

 ಏನಿದು ಪಿಎಂ ಇ-ಡ್ರೈವ್‌ ಯೋಜನೆ? ಈ ಯೋಜನೆಯ ಪ್ರಮುಖ ಭಾಗವೇ ಪಿಎಂ ಇ-ಡ್ರೈವ್ ಡಿಜಿಟಲ್ ವೋಚರ್. ಇ- ವೋಚರ್‌ ಮೂಲಕ ನೀವು ಸುಲಭವಾಗಿ ನಿಮ್ಮ ಎಲೆಕ್ಟ್ರಿಕ್‌ ವಾಹನಗಳಿಗೆ ನೀಡಲಾಗುವ ಸಹಾಯಧನವನ್ನು ಸುಲಭವಾಗಿ ಕ್ಲೈಮ್‌ ಮಾಡಿಕೊಳ್ಳಬಹುದಾಗಿದೆ. ಈ ಹಿನ್ನೆಲೆಯಲ್ಲಿ ಏನಿದು ಪಿಎಂ ಇ-ಡ್ರೈವ್‌ ವೋಚರ್‌ ಅದನ್ನು ಪಡೆಯುವುದು ಹೇಗೆ? ಇತ್ಯಾದಿ ಮಾಹಿತಿಗಳು ಇಲ್ಲಿವೆ.

ಕೇಂದ್ರ ಭಾರೀ ಕೈಗಾರಿಕೆಗಳ ಸಚಿವಾಲಯವು ಪಿಎಂ ಇ-ಡ್ರೈವ್ ಯೋಜನೆಯನ್ನು ಜಾರಿಗೆ ತಂದಿದೆ. ಈ ಯೋಜನೆಯು ಇ-ಟ್ರಕ್‌ಗಳು ಸೇರಿದಂತೆ ಇ-ದ್ವಿಚಕ್ರ, ಇ-ತ್ರಿಚಕ್ರ ಮತ್ತು ಇ-ಬಸ್‌ಗಳಂತಹ ವಿವಿಧ ವಿಭಾಗಗಳಲ್ಲಿ ಎಲೆಕ್ಟ್ರಿಕ್ ವಾಹನಗಳ ಅಳವಡಿಕೆಯನ್ನು ಉತ್ತೇಜಿಸಲು ನೇರ ಖರೀದಿ ಪ್ರೋತ್ಸಾಹಧನ ನೀಡುತ್ತದೆ. ಇದರ ಜೊತೆಗೆ, ಸಾರ್ವಜನಿಕ ಮತ್ತು ವೇಗದ ಚಾರ್ಜಿಂಗ್ ಕೇಂದ್ರಗಳ ಸ್ಥಾಪನೆಗೂ ಇದು ಬೆಂಬಲ ನೀಡುತ್ತದೆ.

ಒಟ್ಟಾರೆಯಾಗಿ, ಕೈಗಾರಿಕೆ-ಬೆಂಬಲಿತ ಖಾತರಿಗಳನ್ನು ಖಚಿತಪಡಿಸಿಕೊಳ್ಳುವುದು. ದೇಶೀಯ ಇಲೆಕ್ಟ್ರಿಕ್‌ ವಾಹನ ಉತ್ಪಾದನೆಯನ್ನು ಉತ್ತೇಜಿಸುವುದು ಮತ್ತು ಇಂಗಾಲ ಹೊರಸೂಸುವಿಕೆಯನ್ನು ಕಡಿಮೆ ಮಾಡುವುದು ಈ ಉಪಕ್ರಮದ ಪ್ರಮುಖ ಉದ್ದೇಶವಾಗಿದೆ.

ಪಿಎಂ ಇ-ಡ್ರೈವ್ ಇ-ವೋಚರ್ ಎಂದರೇನು? ಪಿಎಂ ಇ-ಡ್ರೈವ್ ಡಿಜಿಟಲ್ ವೋಚರ್ ಎನ್ನುವುದು ಅರ್ಹ ವಿದ್ಯುತ್ ವಾಹನಗಳ (ಮುಖ್ಯವಾಗಿ ದ್ವಿಚಕ್ರ ಮತ್ತು ತ್ರಿಚಕ್ರ ವಾಹನಗಳು) ಖರೀದಿದಾರರಿಗೆ ಸರ್ಕಾರದ ವತಿಯಿಂದ ನೀಡಲಾಗುವ ಸಬ್ಸಿಡಿಯನ್ನು ಪಡೆಯಲು ಇರುವ ಡಿಜಿಟಲ್ ಕೂಪನ್ ಆಗಿದೆ. ಇದು ಆಧಾರ್ ಆಧಾರಿತ ಇ-ಕೆವೈಸಿ ಮೂಲಕ ದೃಢೀಕರಿಸಿದ, ಯೋಜನೆಯ ಅಧಿಕೃತ ಪೋರ್ಟಲ್‌ನಲ್ಲಿ ಉತ್ಪಾದಿಸಲ್ಪಡುವ ಒಂದು ವೋಚರ್ ಆಗಿದೆ.

ಇದನ್ನು ಡೀಲರ್‌ಶಿಪ್‌ನಲ್ಲಿ ಬಳಸುವುದರಿಂದ, ವಾಹನದ ಖರೀದಿ ಬೆಲೆಯಲ್ಲಿ ತಕ್ಷಣವೇ ರಿಯಾಯಿತಿ ಸಿಗುತ್ತದೆ. ಪಿಎಂ ಇ-ಡ್ರೈವ್ ಡಿಜಿಟಲ್ ವೋಚರ್ ವಿದ್ಯುತ್ ವಾಹನ ಖರೀದಿಯನ್ನು ಸುಲಭಗೊಳಿಸಿ ಗ್ರಾಹಕರಿಗೆ ಸಬ್ಸಿಡಿಯ ಪ್ರಯೋಜನವನ್ನು ತಕ್ಷಣವೇ ತಲುಪಿಸುವ ಮೂಲಕ ಭಾರತದಲ್ಲಿ ಪರಿಸರ ಸ್ನೇಹಿ ವಾಹನಗಳಿಗೆ ಉತ್ತೇಜನ ನೀಡುವ ಒಂದು ಮಹತ್ವದ ಹೆಜ್ಜೆಯಾಗಿದೆ.

ಡಿಜಿಟಲ್ ವೋಚರ್ ಪಡೆಯುವುದು ಹೇಗೆ? ವಿದ್ಯುತ್ ವಾಹನವನ್ನು ಖರೀದಿಸುವ ಪ್ರಕ್ರಿಯೆಯನ್ನು ಸುಲಭ ಮತ್ತು ತ್ವರಿತಗೊಳಿಸಲು ಈ ಡಿಜಿಟಲ್ ವೋಚರ್ ಅನ್ನು ವಿನ್ಯಾಸಗೊಳಿಸಲಾಗಿದೆ: ಡೀಲರ್ ಪ್ರಕ್ರಿಯೆ ಆರಂಭ: ನೀವು ಅನುಮೋದಿತ ಡೀಲರ್‌ಶಿಪ್‌ನಿಂದ ಅರ್ಹ ಇ-ದ್ವಿಚಕ್ರ ಅಥವಾ ಇ-ತ್ರಿಚಕ್ರ ವಾಹನವನ್ನು ಖರೀದಿಸಲು ಹೋದಾಗ, ಡೀಲರ್ ಪಿಎಂ ಇ- ಡ್ರೈವ್‌ ಪೋರ್ಟಲ್ https://pmedrive.heavyindustries.gov.in/ ಮೂಲಕ ಪ್ರಕ್ರಿಯೆಯನ್ನು ಪ್ರಾರಂಭಿಸುತ್ತಾರೆ. ಆಧಾರ್ ಇ-ಕೆವೈಸಿ ದೃಢೀಕರಣ: ಡೀಲರ್ ಪಿಎಂ ಇ ಡ್ರೈವ್‌ ಆ್ಯಪ್‌ ಬಳಸಿ ಮುಖ ದೃಢೀಕರಣ ಪ್ರಕ್ರಿಯೆಯ ಮೂಲಕ ನಿಮ್ಮ ಆಧಾರ್ ಆಧಾರಿತ ಇ-ಕೆವೈಸಿಯನ್ನು ಪೂರ್ಣಗೊಳಿಸುತ್ತಾರೆ.

ವೋಚರ್ ಉತ್ಪಾದನೆ ಮತ್ತು ಡೌನ್‌ಲೋಡ್: ದೃಢೀಕರಣ ಯಶಸ್ವಿಯಾದ ನಂತರ, ಪೋರ್ಟಲ್‌ನಲ್ಲಿ ಒಂದು ವಿಶಿಷ್ಟವಾದ ಇ-ವೋಚರ್ ಉತ್ಪತ್ತಿಯಾಗುತ್ತದೆ ಮತ್ತು ಅದನ್ನು ಡೌನ್‌ಲೋಡ್ ಮಾಡಲು ಲಿಂಕ್ ನಿಮ್ಮ ನೋಂದಾಯಿತ ಮೊಬೈಲ್ ಸಂಖ್ಯೆಗೆ SMS ಮೂಲಕ ಬರುತ್ತದೆ. ತಕ್ಷಣದ ರಿಯಾಯಿತಿ: ನೀವು ಆ ಇ-ವೋಚರ್‌ಗೆ ಸಹಿ ಮಾಡಿ ಡೀಲರ್‌ಗೆ ಸಲ್ಲಿಸಬೇಕು.

ಡೀಲರ್ ಸಹ ಸಹಿ ಮಾಡಿ, ಸಹಿ ಮಾಡಿದ ವೋಚರ್ ಅನ್ನು ಪೋರ್ಟಲ್‌ಗೆ ಅಪ್‌ಲೋಡ್ ಮಾಡುತ್ತಾರೆ. ಸಬ್ಸಿಡಿ ಮೊತ್ತವು ನಿಮ್ಮ ಅಂತಿಮ ಪಾವತಿಯಿಂದ ತಕ್ಷಣವೇ ಕಡಿತಗೊಳ್ಳುತ್ತದೆ. ದೃಢೀಕರಣ: ಸಹಿ ಮಾಡಿದ ವೋಚರ್‌ನ ನಕಲು ನಿಮಗೆ ಮತ್ತು ಡೀಲರ್‌ಗೆ ಎಸ್‌ಎಂಎಸ್‌ ಮೂಲಕ ಕಳುಹಿಸಲಾಗುತ್ತದೆ. ಮರುಪಾವತಿ: ತಯಾರಕರು ಈ ಸಹಿ ಮಾಡಿದ ಇ-ವೋಚರ್ ಅನ್ನು ಸರ್ಕಾರದಿಂದ ಸಬ್ಸಿಡಿ ಮೊತ್ತವನ್ನು ಮರಳಿ ಪಡೆಯಲು ಪುರಾವೆಯಾಗಿ ಬಳಸುತ್ತಾರೆ.

ವಿವಿಧ ವಾಹನ ಪ್ರಕಾರಗಳಿಗೆ ಸಬ್ಸಿಡಿ ವಿವರಗಳು ಪಿಎಂ ಇ-ಡ್ರೈವ್ ಯೋಜನೆಯಡಿಯಲ್ಲಿ, ಹಣಕಾಸು ವರ್ಷ 2024-25 ಕ್ಕೆ ವಿದ್ಯುತ್ ವಾಹನಗಳ ಖರೀದಿಗೆ ಪ್ರೋತ್ಸಾಹಧನವನ್ನು ನೀಡಲಾಗುತ್ತದೆ. ಇ-ದ್ವಿಚಕ್ರ ವಾಹನಗಳಿಗೆ ಪ್ರತಿ ಕಿಲೋವ್ಯಾಟ್‌ ಬ್ಯಾಟರಿ ಸಾಮರ್ಥ್ಯಕ್ಕೆ 5,000 ರೂ. ರಂತೆ ಗರಿಷ್ಠ 10,000 ರೂ. ವರೆಗೆ ಸಬ್ಸಿಡಿ ಲಭ್ಯವಿದೆ. ಇ-ತ್ರಿಚಕ್ರ ವಾಹನಗಳಿಗೆ ಪ್ರತಿ ಕಿಲೋವ್ಯಾಟ್‌ಗೆ 5,000 ರೂ. ರಂತೆ ಗರಿಷ್ಠ 50,000 ರೂ. ವರೆಗೆ ಸಬ್ಸಿಡಿ ಸಿಗುತ್ತದೆ.

ಸಾರ್ವಜನಿಕ ಸಾರಿಗೆಯ ಭಾಗವಾಗಿರುವ ಇ-ಬಸ್‌ಗಳಿಗೆ ಪ್ರತಿ ಕಿಲೋವ್ಯಾಟ್‌ಗೆ 10,000 ರೂ.ರಂತೆ ಗರಿಷ್ಠ 35 ಲಕ್ಷ ರೂ.ದವರೆಗೆ ಪ್ರೋತ್ಸಾಹಧನ ನಿಗದಿಪಡಿಸಲಾಗಿದೆ. ಇ-ಟ್ರಕ್‌ಗಳಿಗೆ ಪ್ರತಿ ಕಿಲೋವ್ಯಾಟ್‌ ಬ್ಯಾಟರಿ ಸಾಮರ್ಥ್ಯಕ್ಕೆ 5,000 ರೂ. ಜೊತೆಗೆ ಎಕ್ಸ್-ಫ್ಯಾಕ್ಟರಿ ಬೆಲೆಯ 10% ರಷ್ಟು (ಗರಿಷ್ಠ 1.25 ಕೋಟಿ ರೂ.) ಸಬ್ಸಿಡಿ ದೊರೆಯುತ್ತದೆ.

(ಪಾಲಿಹೌಸ್‌ ನಿರ್ಮಾಣಕ್ಕೆ ಸಹಾಯಧನ) ಅರ್ಹತಾ ಮಾನದಂಡಗಳು ಪಿಎಂ ಇ-ಡ್ರೈವ್ ಡಿಜಿಟಲ್ ವೋಚರ್‌ಗೆ ಅರ್ಹರಾಗಲು ನೀವು ಈ ಕೆಳಗಿನ ಷರತ್ತುಗಳನ್ನು ಪೂರೈಸಬೇಕು: ಭಾರತೀಯ ನಾಗರಿಕರಾಗಿರಬೇಕು ಮತ್ತು ಅಧಿಕೃತ ಡೀಲರ್‌ಶಿಪ್‌ನಿಂದ ವಾಹನ ಖರೀದಿಸಬೇಕು. ವಾಹನವು ಪಿಎಂ ಇ-ಡ್ರೈವ್‌ ಯೋಜನೆಯಡಿ ನೋಂದಾಯಿತ ಮೂಲ ಉತ್ಪನ್ನ ತಯಾರಕರಿಂದ ತಯಾರಿಸಲ್ಪಟ್ಟಿರಬೇಕು.

ಖರೀದಿಸುವ ಇವಿ, ಯೋಜನೆಯ ಕಾರ್ಯಕ್ಷಮತೆಯ ಮಾನದಂಡಗಳನ್ನು ಪೂರೈಸುವ ಸುಧಾರಿತ ಬ್ಯಾಟರಿ ಹೊಂದಿರಬೇಕು. ವ್ಯಕ್ತಿಗಳು ಒಂದು ನಿರ್ದಿಷ್ಟ ವರ್ಗದಲ್ಲಿ ಕೇವಲ ಒಂದು ವಾಹನಕ್ಕೆ ಮಾತ್ರ ಪ್ರೋತ್ಸಾಹಧನ ಪಡೆಯಬಹುದು. ದೃಢೀಕರಣಕ್ಕಾಗಿ ನಿಮ್ಮ ಆಧಾರ್‌ಗೆ ಲಿಂಕ್ ಆಗಿರುವ ಮೊಬೈಲ್ ಸಂಖ್ಯೆ ಹೊಂದಿರಬೇಕು. ಖರೀದಿಸಿದ ಇವಿ ಅನ್ನು ಪ್ರಾದೇಶಿಕ ಸಾರಿಗೆ ಕಚೇರಿಯಲ್ಲಿ (RTO) ನೋಂದಾಯಿಸಬೇಕು.

ಯಾವೆಲ್ಲಾ ವಾಹನಗಳಿಗೆ ಸಬ್ಸಿಡಿ ಲಭ್ಯವಿಲ್ಲ? ಈ ಯೋಜನೆಯು ಕೈಗೆಟುಕುವ ಮತ್ತು ಪರಿಸರ ಸ್ನೇಹಿ ಸಾರ್ವಜನಿಕ ಸಾರಿಗೆ ಮತ್ತು ಸಾಮೂಹಿಕ ಚಲನಶೀಲತೆ ಪರಿಹಾರಗಳನ್ನು ಉತ್ತೇಜಿಸುವುದರ ಮೇಲೆ ಹೆಚ್ಚು ಗಮನಹರಿಸುತ್ತದೆ, ಆದ್ದರಿಂದ ಖಾಸಗಿ ಕಾರುಗಳಿಗೆ ಸಬ್ಸಿಡಿ ಇಲ್ಲ. ಕೇಂದ್ರ ಅಥವಾ ರಾಜ್ಯ ಸರ್ಕಾರದ ಇಲಾಖೆಗಳು ಅಥವಾ ಏಜೆನ್ಸಿಗಳು ಖರೀದಿಸುವ ಇವಿಗಳಿಗೆ ಪ್ರೋತ್ಸಾಹಧನ ಅನ್ವಯಿಸುವುದಿಲ್ಲ. ಮರುಮಾರಾಟ ಮಾಡಿದ ಇವಿಗಳು: ಈ ಪ್ರೋತ್ಸಾಹಧನವು ಹೊಸ, ಅರ್ಹ ಇವಿಯ ಮೂಲ ಖರೀದಿಗೆ ಮಾತ್ರ ಲಭ್ಯ.”