ಟಾಟಾ ಮೋಟಾರ್ಸ್ ತನ್ನ ವ್ಯವಹಾರವನ್ನು ಪುನರ್‌ರಚಿಸಿದ್ದು ‘ಟಾಟಾ ಮೋಟಾರ್ಸ್ ಪ್ಯಾಸೆಂಜರ್ ವೆಹಿಕಲ್ಸ್’ ಎಂಬ ಹೊಸ ಹೆಸರಿನಲ್ಲಿ ವಹಿವಾಟು ಆರಂಭ

ಅಕ್ಟೋಬರ್ 24 ರಿಂದ, ಬಿಎಸ್‌ಇ ಮತ್ತು ಎನ್‌ಎಸ್‌ಇಯಲ್ಲಿ ಟಾಟಾ ಮೋಟಾರ್ಸ್‌ನ ಷೇರುಗಳು ಟಿಎಂಪಿವಿ ಹೆಸರಿನಲ್ಲಿ ವಹಿವಾಟು ಪ್ರಯಾಣಿಕ ವಾಹನ ಮತ್ತು ವಾಣಿಜ್ಯ ವಾಹನ ವ್ಯವಹಾರಗಳನ್ನು ಎರಡು ಪ್ರತ್ಯೇಕ ಘಟಕಗಳಾಗಿ ವಿಭಜಿಸಿದೆ ಕಂಪನಿ ಎಲೆಕ್ಟ್ರಿಕ್ ವಾಹನಗಳು ಮತ್ತು ಜಗ್ವಾರ್ ಲ್ಯಾಂಡ್ ರೋವರ್ ವ್ಯವಹಾರವನ್ನೂ ಒಳಗೊಂಡಿದೆ ಪ್ರಯಾಣಿಕ ವಾಹನ ವಿಭಾಗ ಷೇರುಪೇಟೆಯಲ್ಲಿ ಪ್ರತ್ಯೇಕವಾಗಿ ಲಿಸ್ಟ್ ಆಗಲಿದೆ ವಾಣಿಜ್ಯ ವಾಹನ ವಿಭಾಗ, ಈ ಪ್ರಕ್ರಿಯೆ ನವೆಂಬರ್ ಅಂತ್ಯದೊಳಗೆ ಪೂರ್ಣಗೊಳ್ಳುವ ನಿರೀಕ್ಷೆ ಟಾಟಾ ಮೋಟಾರ್ಸ್‌ ಷೇರುಗಳು ಟಿಎಂಪಿವಿ ಹೆಸರಿನೊಂದಿಗೆ ಷೇರುಪೇಟೆಯಲ್ಲಿ ವಹಿವಾಟು ನಡೆಸುತ್ತಿವೆ.

ಖ್ಯಾತ ವಾಹನ ತಯಾರಕ ಕಂಪನಿ ಟಾಟಾ ಮೋಟಾರ್ಸ್ ತನ್ನ ವ್ಯವಹಾರದಲ್ಲಿ ಮಹತ್ವದ ಬದಲಾವಣೆ ಮಾಡಿಕೊಂಡಿದ್ದು, ಇಂದಿನಿಂದ (ಅಕ್ಟೋಬರ್ 24) ಹೊಸ ಹೆಸರಿನೊಂದಿಗೆ ಷೇರು ಮಾರುಕಟ್ಟೆಯಲ್ಲಿ ವಹಿವಾಟು ನಡೆಸಲಿದೆ. ಕಂಪನಿಯ ವಿಭಜನೆಯ ನಂತರ, ಟಾಟಾ ಮೋಟಾರ್ಸ್ ಅನ್ನು ‘ಟಾಟಾ ಮೋಟಾರ್ಸ್ ಪ್ಯಾಸೆಂಜರ್ ವೆಹಿಕಲ್ಸ್ ‘ (ಟಿಎಂಪಿವಿ) ಎಂದು ಮರುನಾಮಕರಣ ಮಾಡಲಾಗಿದೆ.

ಟಾಟಾ ಮೋಟಾರ್ಸ್ ಕಂಪನಿಯು ತನ್ನ ದಶಕಗಳಷ್ಟು ಹಳೆಯ ವ್ಯವಹಾರ ರಚನೆಯನ್ನು ಬದಲಾಯಿಸಿದ್ದು, ಇಂದಿನಿಂದ ಅಂದರೆ ಅಕ್ಟೋಬರ್ 24ರಿಂದ ಷೇರುಪೇಟೆಯಲ್ಲಿ ‘ಟಿಎಂಪಿವಿ’ ಎಂಬ ಹೊಸ ಗುರುತಿನೊಂದಿಗೆ ಕಾಣಿಸಿಕೊಂಡಿದೆ. ಇದು ಕಂಪನಿಯ ವಿಭಜನೆ ಪ್ರಕ್ರಿಯೆಯ ಅಂತಿಮ ಹಂತವಾಗಿದೆ.

ಪುನರ್‌ರಚನೆಯ ಭಾಗವಾಗಿ, ಟಾಟಾ ಮೋಟಾರ್ಸ್ ತನ್ನ ಎರಡು ಪ್ರಮುಖ ವ್ಯವಹಾರಗಳನ್ನು ಪ್ರತ್ಯೇಕಿಸಿದೆ: ಟಾಟಾ ಮೋಟಾರ್ಸ್ ಪ್ಯಾಸೆಂಜರ್ ವೆಹಿಕಲ್ಸ್ (ಟಿಎಂಪಿವಿ): ಇದು ಪ್ರಯಾಣಿಕರ ಕಾರುಗಳು, ಎಲೆಕ್ಟ್ರಿಕ್ ವಾಹನಗಳು (ಇವಿ) ಹಾಗೂ ಜಗ್ವಾರ್ ಲ್ಯಾಂಡ್ ರೋವರ್ (ಜೆಎಲ್‌ಆರ್‌) ವ್ಯವಹಾರವನ್ನು ಒಳಗೊಂಡಿದೆ. ದೇಶೀಯ ಮಾರುಕಟ್ಟೆಯಲ್ಲಿ ಬೆಳವಣಿಗೆಯ ಪ್ರಮುಖ ಆಧಾರಸ್ತಂಭಗಳಾಗಿರುವ ಈ ವಿಭಾಗವನ್ನು ಪ್ರತ್ಯೇಕ ಘಟಕವಾಗಿ ರೂಪಿಸಲಾಗಿದೆ.

ಟಾಟಾ ಮೋಟಾರ್ಸ್ ಕಮರ್ಷಿಯಲ್ ವೆಹಿಕಲ್ಸ್ (ಟಿಎಂಎಲ್‌ಸಿವಿ): ಈ ಕಂಪನಿಯು ಟ್ರಕ್‌ಗಳು, ಬಸ್‌ಗಳು ಮತ್ತು ರಕ್ಷಣಾ ವಾಹನಗಳಂತಹ ವಾಣಿಜ್ಯ ವಾಹನಗಳ ವ್ಯವಹಾರವನ್ನು ಮುಂದುವರಿಸಲಿದೆ. ಈ ಕಂಪನಿಯನ್ನು ಮುಂದಿನ ಕೆಲವೇ ವಾರಗಳಲ್ಲಿ ಷೇರು ಮಾರುಕಟ್ಟೆಯಲ್ಲಿ ಪ್ರತ್ಯೇಕವಾಗಿ ಲಿಸ್ಟ್ ಮಾಡಲಾಗುತ್ತದೆ. ಷೇರುದಾರರಿಗೆ ಏನು ಲಾಭ? ಈ ವಿಭಜನೆಯು ಅಕ್ಟೋಬರ್ 1 ರಂದು ಅಧಿಕೃತವಾಗಿ ಜಾರಿಗೆ ಬಂದಿದ್ದು, ಅಕ್ಟೋಬರ್ 14 ಅನ್ನು ದಾಖಲೆ ದಿನಾಂಕವಾಗಿ ನಿಗದಿಪಡಿಸಲಾಗಿತ್ತು. ಷೇರುದಾರರು ತಮ್ಮ ಬಳಿ ಇರುವ ಪ್ರತಿ ಟಾಟಾ ಮೋಟಾರ್ಸ್ ಷೇರಿಗೆ ಪ್ರತಿಯಾಗಿ, ಹೊಸದಾಗಿ ರಚನೆಯಾದ ವಾಣಿಜ್ಯ ವಾಹನ ಕಂಪನಿಯ (ಟಿಎಂಎಲ್‌ಸಿವಿ) ಒಂದು ಷೇರನ್ನು 1:1 ಅನುಪಾತದಲ್ಲಿ ಪಡೆದಿದ್ದಾರೆ.

ಷೇರುಗಳ ಟ್ರೇಡಿಂಗ್ ಯಾವಾಗ? ಹೊಸ ವಾಣಿಜ್ಯ ವಾಹನ ಕಂಪನಿಯ ಷೇರುಗಳನ್ನು ಈಗಾಗಲೇ ಷೇರುದಾರರ ಡಿಮ್ಯಾಟ್‌ ಖಾತೆಗಳಿಗೆ ಜಮಾ ಮಾಡಲಾಗಿದ್ದರೂ, ಅವುಗಳನ್ನು ಸದ್ಯಕ್ಕೆ ಮಾರಾಟ ಮಾಡಲು ಅಥವಾ ಖರೀದಿಸಲು ಸಾಧ್ಯವಿಲ್ಲ. ಷೇರು ವಿನಿಮಯ ಕೇಂದ್ರಗಳಿಂದ (ಬಿಎಸ್‌ಇ ಮತ್ತು ಎನ್‌ಎಸ್‌ಇ ) ಲಿಸ್ಟಿಂಗ್ ಮತ್ತು ವಹಿವಾಟಿಗೆ ಅನುಮೋದನೆ ಸಿಕ್ಕ ನಂತರವೇ ಇದು ಸಾಧ್ಯ. ಸಾಮಾನ್ಯವಾಗಿ ಈ ಪ್ರಕ್ರಿಯೆಯು 45 ರಿಂದ 60 ದಿನಗಳನ್ನು ತೆಗೆದುಕೊಳ್ಳುವುದರಿಂದ, ನವೆಂಬರ್ ಅಂತ್ಯದ ವೇಳೆಗೆ ಟಿಎಂಎಲ್‌ಸಿವಿ ಷೇರುಗಳ ವಹಿವಾಟು ಆರಂಭವಾಗುವ ನಿರೀಕ್ಷೆಯಿದೆ.

ವಿಭಜನೆಗೆ ಕಾರಣ ಏನು? ಕಾರ್ಯಾಚರಣೆಯಲ್ಲಿ ಸ್ವಾತಂತ್ರ್ಯ, ತ್ವರಿತ ನಿರ್ಧಾರ ಕೈಗೊಳ್ಳುವಿಕೆ ಮತ್ತು ಬಂಡವಾಳದ ಸಮರ್ಪಕ ಹಂಚಿಕೆಯನ್ನು ಸುಲಭಗೊಳಿಸುವುದು ಈ ವಿಭಜನೆಯ ಮುಖ್ಯ ಉದ್ದೇಶವಾಗಿದೆ. ಇತ್ತೀಚಿನ ವರ್ಷಗಳಲ್ಲಿನ ಮಾರುಕಟ್ಟೆ ಸವಾಲುಗಳು ಮತ್ತು ದುರ್ಬಲ ಆರ್ಥಿಕ ಕಾರ್ಯಕ್ಷಮತೆಯ ಹಿನ್ನೆಲೆಯಲ್ಲಿ, ಈ ಕ್ರಮವು ಪ್ರತಿಯೊಂದು ವಿಭಾಗದ ಮೌಲ್ಯವನ್ನು ಪ್ರತ್ಯೇಕವಾಗಿ ಅಳೆಯಲು ಹೂಡಿಕೆದಾರರಿಗೆ ಸಹಾಯ ಮಾಡುತ್ತದೆ ಎಂದು ವಿಶ್ಲೇಷಕರು ಅಭಿಪ್ರಾಯಪಟ್ಟಿದ್ದಾರೆ.

ದಾಖಲೆ ದಿನಾಂಕದ ನಂತರ, ಟಾಟಾ ಮೋಟಾರ್ಸ್ ಷೇರಿನ ಬೆಲೆಯು ಸುಮಾರು ಶೇ. 40ರಷ್ಟು ಕುಸಿತ ಕಂಡಿತ್ತು. ಇದು ಮೌಲ್ಯದಲ್ಲಿನ ನಷ್ಟವಲ್ಲ, ಬದಲಾಗಿ ವಿಭಜನೆಯ ನಂತರದ ತಾಂತ್ರಿಕ ಹೊಂದಾಣಿಕೆ ಅಷ್ಟೇ. ಏಕೆಂದರೆ ಈಗ ಎರಡೂ ಘಟಕಗಳನ್ನು ಸ್ವತಂತ್ರವಾಗಿ ಮೌಲ್ಯಮಾಪನ ಮಾಡಲಾಗುತ್ತದೆ.”