ʼಹೈಜೀನ್ ಆನ್ ಗೋʼ ಪೊಲೀಸರಿಗೆ ವಿಶೇಷ  ಸಂಚಾರಿ ಶೌಚಾಲಯ ಸೇವೆ

ಬೆಂಗಳೂರು: ಪೊಲೀಸರಿಗೆ ವಿಶೇಷ ʼಹೈಜೀನ್ ಆನ್ ಗೋʼ ಸಂಚಾರಿ ಶೌಚಾಲಯ ಸೇವೆ ಉದ್ಘಾಟಿಸಿದ ಗೃಹ ಸಚಿವ ಡಾ.ಜಿ.ಪರಮೇಶ್ವರ್‌ 80 ಲಕ್ಷ ರೂ. ವ್ಯಯಿಸಿ 3 ರೆನಾಲ್ಟ್‌ ವಾಹನಗಳ ಮರುವಿನ್ಯಾಸ ಥಣಿಸಂದ್ರ, ಆಡುಗೋಡಿ ಮತ್ತು ಮೈಸೂರು ರಸ್ತೆಯ 91 ಪೂರ್ವ ನಿಗದಿತ ಸ್ಥಳಗಳಲ್ಲಿ ಸಂಚಾರ ಶೌಚಾಲಯ ಸೇವೆ

ಕರ್ತವ್ಯ ನಿರತ ಪೊಲೀಸ್‌ ಸಿಬ್ಬಂದಿಯ ಅನುಕೂಲಕ್ಕಾಗಿ ರೆನಾಲ್ಟ್‌ ನಿಸಾನ್‌ ಟೆಕ್ನಾಲಜಿ ಆ್ಯಂಡ್‌ ಬಿಸಿನೆಸ್‌ ಸೆಂಟರ್‌ ಇಂಡಿಯಾ ಪ್ರೈವೆಟ್‌ ಲಿಮಿಟೆಡ್‌ (ಆರ್‌ಎನ್‌ಟಿಬಿಸಿಐ) ಕಂಪನಿಯು ಸಿಎಸ್‌ಆರ್‌ ನೆರವಿನಡಿ ಪೊಲೀಸ್‌ ಇಲಾಖೆಗೆ ನೀಡಿರುವ ‘ಹೈಜೀನ್‌ ಆನ್‌ ಗೋ’ ವಾಹನಗಳ ಸೇವೆಗೆ ಗೃಹ ಸಚಿವ ಡಾ.ಜಿ.ಪರಮೇಶ್ವರ್‌ ನಗರದಲ್ಲಿ ಶುಕ್ರವಾರ ಚಾಲನೆ ನೀಡಿದರು.

ಪೊಲೀಸರಿಗೆ ವಿಶೇಷ ಹೈಜಿನ್‌ ಆನ್‌ ಗೋ ಶೌಚಾಲಯ ರೆನಾಲ್ಟ್‌ ಕಂಪನಿಯ ಸಿಎಸ್‌ಆರ್‌ ಹಣಕಾಸು ನೆರವಿನಲ್ಲಿ ಹ್ಯಾಂಡ್‌ ಇನ್‌ ಹ್ಯಾಂಡ್‌ ಇಂಡಿಯಾ ಸಂಸ್ಥೆಯು ‘ಹೈಜೀನ್‌ ಆನ್‌ ಗೋ’ ಸಂಚಾರ ಶೌಚಾಲಯ ವಾಹನಗಳನ್ನು ರೂಪಿಸಿದೆ. ನಗರದ ತೀವ್ರ ವಾಹನ ದಟ್ಟಣೆಯ ವಿವಿಧ ರಸ್ತೆಗಳಲ್ಲಿ ಕರ್ತವ್ಯ ನಿರ್ವಹಿಸುವ ಸಂಚಾರ ಪೊಲೀಸರಿಗೆ ಈ ವಾಹನಗಳ ಸೇವೆ ಲಭ್ಯವಿರಲಿದೆ.

ನಗರದಲ್ಲಿ ಪೊಲೀಸರು ಸಂಚಾರ ನಿರ್ವಹಣೆ ಮಾಡುವಾಗ ಶೌಚಾಲಯಕ್ಕೆ ಹೋಗುವುದಕ್ಕೂ ಬಿಡುವು ಸಿಗುವುದಿಲ್ಲ. ಜತೆಗೆ, ಸಮೀಪದಲ್ಲಿ ಶೌಚಾಲಯ ಸಿಗುವುದು ಕಷ್ಟ. ಶೌಚ ಬಾಧೆ ತೀರಿಸಿಕೊಳ್ಳಲು ಸಾಧ್ಯವಾಗದೆ ಸಂಚಾರ ಪೊಲೀಸರು ನಿರ್ಜಲೀಕರಣ, ಮೂತ್ರನಾಳದ ಸೋಂಕು ಸೇರಿದಂತೆ ಅನೇಕ ಆರೋಗ್ಯ ಸಮಸ್ಯೆಗಳಿಗೆ ತುತ್ತಾಗುತ್ತಾರೆ.

ಮಹಿಳಾ ಸಿಬ್ಬಂದಿ ಜನನಿಬಿಡ ರಸ್ತೆಗಳಲ್ಲಿ ಕಾರ್ಯ ನಿರ್ವಹಿಸುವಾಗ ಇನ್ನೂ ಹೆಚ್ಚು ಕಷ್ಟ ಅನುಭವಿಸುತ್ತಾರೆ. ಈ ಸಮಸ್ಯೆಯ ಪರಿಹಾರಕ್ಕಾಗಿ ‘ಹೈಜೀನ್‌ ಆನ್‌ ಗೋ’ ವಾಹನಗಳನ್ನು ಸಿದ್ಧಪಡಿಸಲಾಗಿದೆ.

ಮೂರು ವಾಹನಗಳ ಮರುವಿನ್ಯಾಸಕ್ಕೆ ಸುಮಾರು 80 ಲಕ್ಷ ರೂ. ವ್ಯಯಿಸಲಾಗಿದೆ. 91 ಪೂರ್ವ ನಿಗದಿತ ಸ್ಥಳಗಳಲ್ಲಿ ಸಂಚಾರ ಶೌಚಾಲಯ ಸೇವೆ ಹೆಚ್ಚಿನ ವಾಹನ ದಟ್ಟಣೆಯ ಮಾರ್ಗಗಳಾದ ಥಣಿಸಂದ್ರ, ಆಡುಗೋಡಿ ಮತ್ತು ಮೈಸೂರು ರಸ್ತೆಯ 91 ಪೂರ್ವ ನಿಗದಿತ ಸ್ಥಳಗಳಲ್ಲಿ ಇವು ಕಾಲಕಾಲಕ್ಕೆ ಬಂದು ನಿಲ್ಲುತ್ತವೆ.

ಈ ವಾಹನಗಳು ಪ್ರತಿನಿತ್ಯ ಬೆಳಗ್ಗೆ 8.30ರಿಂದ ಸಂಜೆ 7ರವರೆಗೆ ಕಾರ್ಯ ನಿರ್ವಹಿಸುತ್ತವೆ. ಸಂಚಾರ ಪೊಲೀಸರು ಈ ವಾಹನಗಳನ್ನು ಬಳಸಿಕೊಳ್ಳಬಹುದು.

ರಾಜ್ಯ ಪೊಲೀಸ್‌ ಮಹಾ ನಿರ್ದೇಶಕ ಡಾ.ಎಂ.ಎ.ಸಲೀಂ , ಅಗ್ನಿಶಾಮಕ ಮತ್ತು ತುರ್ತು ಸೇವೆಗಳ ಇಲಾಖೆ ಡಿಜಿಪಿ ಪ್ರಶಾಂತ್‌ ಕುಮಾರ್‌ ಠಾಕೂರ್‌, ಆಂತರಿಕ ಭದ್ರತಾ ವಿಭಾಗದ ಡಿಜಿಪಿ ಪ್ರಣಬ್‌ ಮೊಹಾಂತಿ , ನಗರ ಪೊಲೀಸ್‌ ಆಯುಕ್ತ ಸೀಮಂತ್‌ ಕುಮಾರ್‌ ಸಿಂಗ್‌ , ಎಡಿಜಿಪಿಗಳಾದ ಆರ್‌.ಹಿತೇಂದ್ರ , ಬಿ.ದಯಾನಂದ, ಪಿ.ಹರಿಶೇಖರನ್‌, ಸೌಮೇಂದು ಮುಖರ್ಜಿ, ಆರ್‌ಎನ್‌ಟಿಬಿಸಿಐ ವ್ಯವಸ್ಥಾಪಕ ನಿರ್ದೇಶಕ ದೇಬಶಿಶ್‌ ನಿಯೋಗಿ, ಹ್ಯಾಂಡ್‌ ಇನ್‌ ಹ್ಯಾಂಡ್‌ ಇಂಡಿಯಾ ಸಂಸ್ಥೆಯ ಕಾರ್ಯನಿರ್ವಾಹಕ ಅಧ್ಯಕ್ಷೆ ಡಾ.ಕಲ್ಪನಾ ಶಂಕರ್‌ ಹಾಜರಿದ್ದರು.

ಬೆಂಗಳೂರು ‘ಹಳದಿ ಮೆಟ್ರೋ’ ಮಾರ್ಗಕ್ಕೆ ನರೇಂದ್ರ ಮೋದಿ ಕೊಡಲಿದ್ದಾರೆ ಗ್ರೀನ್ ಸಿಗ್ನಲ್! ಆಗಸ್ಟ್‌ 10ಕ್ಕೆ ಮುಹೂರ್ತ ನಿಗದಿ ವಾಹನದಲ್ಲಿರುವ ಸೌಕರ್ಯಗಳು * ಮಹಿಳೆಯರು ಮತ್ತು ಪುರುಷರಿಗೆ ಪ್ರತ್ಯೇಕ ಶೌಚಾಲಯ * ಹ್ಯಾಂಡ್‌ ವಾಶ್‌ ಮತ್ತು ನೈರ್ಮಲ್ಯ ಸಾಧನಗಳು * ಮಹಿಳೆಯರಿಗೆ ಸ್ಯಾನಿಟರಿ ನ್ಯಾಪ್ಕಿನ್‌ ವ್ಯವಸ್ಥೆ * ಕನ್ನಡಿ ಮತ್ತು ಮೂಲಭೂತ ಸೌಕರ್ಯಗಳು * ಪ್ರಥಮ ಚಿಕಿತ್ಸೆ ಮತ್ತು ಅಗ್ನಿಶಾಮಕ ಸಲಕರಣೆಗಳು * ಜಿಪಿಎಸ್‌ ಟ್ರ್ಯಾಕಿಂಗ್‌ * ಹೊರ ಭಾಗದಲ್ಲಿ ಸಿ.ಸಿ ಕ್ಯಾಮೆರಾ”