ದಕ್ಷಿಣ ಕನ್ನಡ ಮತ್ತು ಉಡುಪಿ ಜಿಲ್ಲೆಗಳಲ್ಲಿ ವಾಹನ ಖರೀದಿಯಲ್ಲಿ ಗಣನೀಯ ಏರಿಕೆ

ಕುಂದಾಪುರ : ಮಂಗಳೂರು, ಉಡುಪಿ, ಪುತ್ತೂರು ಮತ್ತು ಬಂಟ್ವಾಳ ಪ್ರದೇಶಗಳಲ್ಲಿ ಖರೀದಿಸಿದ ವಾಹನಗಳನ್ನು ನೋಂದಾಯಿಸಲಾಗಿದೆ. ವಾಹನ ಮಾರಾಟ ಶೇ.20 ರಿಂದ 30ರಷ್ಟು ಹೆಚ್ಚಾಗಿದೆ. ವಾಹನ ನೋಂದಣಿ ಪ್ರಕ್ರಿಯೆಗಳನ್ನು ಆನ್‌ಲೈನ್‌ನಲ್ಲಿ ನಡೆಸಲಾಗುತ್ತಿದ್ದು, ಈ ತಿಂಗಳ ಅಂತ್ಯದ ವೇಳೆಗೆ ಅನೇಕ ಬಾಕಿ ನೋಂದಣಿಗಳು ಪೂರ್ಣಗೊಳ್ಳುವ ನಿರೀಕ್ಷೆಯಿದೆ.

ದಸರಾದಿಂದ ಆರಂಭಗೊಂಡ ವಾಹನ ಮಾರಾಟ ದೀಪಾವಳಿಯ ಸಮಯದಲ್ಲಿ ಗರಿಷ್ಠ ಮಟ್ಟವನ್ನು ತಲುಪಿದ್ದು, ಈಗಲೂ ಖರೀದಿ ಮುಂದುವರಿಸಿದೆ. ಜಿಎಸ್‌ಟಿ ದರಗಳಲ್ಲಿನ ಕಡಿತ ಮತ್ತು ಹಬ್ಬದ ಆಕರ್ಷಕ ಕೊಡುಗೆಗಳು ಗ್ರಾಹಕರನ್ನು ಶೋರೂಂಗಳತ್ತ ಆಕರ್ಷಿಸಿವೆ. ಹೊಸ ವರ್ಷದವರೆಗೂ ವಾಹನ ಖರೀದಿ ಮುಂದುವರಿಯುವ ನಿರೀಕ್ಷೆ ಹೊಂದಿದೆ.

ದ್ವಿಚಕ್ರ ವಾಹನ ಪ್ರಾಬಲ್ಯ: ಮಂಗಳೂರು, ಉಡುಪಿ, ಪುತ್ತೂರು ಮತ್ತು ಬಂಟ್ವಾಳ ಪ್ರದೇಶಗಳಲ್ಲಿ ಖರೀದಿಸಿದ ವಾಹನಗಳನ್ನು ನೋಂದಾಯಿಸಲಾಗಿದೆ. ಆದರೆ ಹಲವಾರು ನೋಂದಣಿಗಳು ಇನ್ನೂ ಪ್ರಕ್ರಿಯೆಯಲ್ಲಿವೆ. ಡೀಲರ್‌ಶಿಪ್‌ಗಳ ಮಾಹಿತಿ ಪ್ರಕಾರ, ಈ ಹಣಕಾಸು ವರ್ಷದಲ್ಲಿ ವಾಹನ ಮಾರಾಟ ಶೇ.20 ರಿಂದ 30ರಷ್ಟು ಹೆಚ್ಚಾಗಿದೆ. ಕೆಲವು ಬ್ರ್ಯಾಂಡ್‌ಗಳು ಕಳೆದ ವರ್ಷಕ್ಕೆ ಹೋಲಿಸಿದರೆ ಶೇ.80ರಷ್ಟು ಬೆಳವಣಿಗೆ ದಾಖಲಿಸಿವೆ.

ಹೊಸದಾಗಿ ಖರೀದಿಸಿದ ವಾಹನಗಳಲ್ಲಿ ದ್ವಿಚಕ್ರ ವಾಹನಗಳು ಮಾರುಕಟ್ಟೆಯಲ್ಲಿ ಪ್ರಾಬಲ್ಯ ಸಾಧಿಸುತ್ತಲೇ ಇವೆ. ಮಂಗಳೂರು ಆರ್‌ಟಿಒ ವ್ಯಾಪ್ತಿಯಲ್ಲಿ ಇಲ್ಲಿಯವರೆಗೆ ಒಟ್ಟು 38,969 ವಾಹನಗಳು ನೋಂದಣಿಯಾಗಿದ್ದು, ಅಕ್ಟೋಬರ್‌ನಲ್ಲಿ4,117 ವಾಹನಗಳು ನೋಂದಣಿಯಾಗಿವೆ. ಉಡುಪಿ ಜಿಲ್ಲೆಯಲ್ಲಿ ಒಟ್ಟು 26,568 ವಾಹನಗಳು ನೋಂದಣಿಯಾಗಿವೆ.

ಅದರಲ್ಲಿ4,506 ಅಕ್ಟೋಬರ್‌ನಲ್ಲಿ ನೊಂದಾಯಿಸಲ್ಪಟ್ಟಿದೆ. ಪುತ್ತೂರು ಆರ್‌ಟಿಒ ವ್ಯಾಪ್ತಿಯಲ್ಲಿ ಇಲ್ಲಿಯವರೆಗೆ 9,696 ವಾಹನಗಳು ನೋಂದಣಿಯಾಗಿವೆ. ಅಕ್ಟೋಬರ್‌ನಲ್ಲಿ 1,081 ನೋಂದಣಿಯಾಗಿತ್ತು. ಬಂಟ್ವಾಳ ಆರ್‌ಟಿಒ ಒಟ್ಟು 5,950 ವಾಹನ ನೋಂದಣಿಗಳನ್ನು ಕಂಡಿದ್ದು, ಇದರಲ್ಲಿಅಕ್ಟೋಬರ್‌ನಲ್ಲಿ 681 ಸೇರಿವೆ. ಅಕ್ಟೋಬರ್‌ ತಿಂಗಳ ಅಂಕಿ ಅಂಶಗಳ ಪ್ರಕಾರ ಮಂಗಳೂರಿನಲ್ಲಿ 2,227 ಪೆಟ್ರೋಲ್‌ ವಾಹನಗಳು, 205 ಡೀಸೆಲ್‌ ವಾಹನಗಳು ಮತ್ತು 70 ಎಲೆಕ್ಟ್ರಿಕ್‌ ವಾಹನಗಳ ನೋಂದಣಿ, ಉಡುಪಿಯಲ್ಲಿ 3,141 ಪೆಟ್ರೋಲ್‌ ವಾಹನಗಳು, 940 ಡೀಸೆಲ್‌ ವಾಹನಗಳು ಮತ್ತು 420 ಎಲೆಕ್ಟ್ರಿಕ್‌ ವಾಹನಗಳು, ಪುತ್ತೂರಿನಲ್ಲಿ 5,568 ಪೆಟ್ರೋಲ್‌, 686 ಡೀಸೆಲ್‌ ಮತ್ತು 618 ಎಲೆಕ್ಟ್ರಿಕ್‌ ವಾಹನಗಳು ಹಾಗೂ ಬಂಟ್ವಾಳದಲ್ಲಿ 3,131 ಪೆಟ್ರೋಲ್‌, 558 ಡೀಸೆಲ್‌ ಮತ್ತು 473 ಎಲೆಕ್ಟ್ರಿಕ್‌ ವಾಹನಗಳ ನೋಂದಣಿಯಾಗಿದೆ. ಉಡುಪಿ ಪ್ರಾದೇಶಿಕ ಸಾರಿಗೆ ಕಚೇರಿಯಲ್ಲಿ, ಅಕ್ಟೋಬರ್‌ನಲ್ಲಿ3,143 ದ್ವಿಚಕ್ರ ವಾಹನಗಳು, 851 ಕಾರುಗಳು ಮತ್ತು 512 ಇತರ ವಾಹನಗಳ ನೋಂದಣಿಯಾಗಿದೆ. ಹಿಂದಿನ ತಿಂಗಳುಗಳಿಗೆ ಹೋಲಿಸಿದರೆ ಗಮನಾರ್ಹ ಹೆಚ್ಚಳ ಎಂದು ಅಧಿಕಾರಿಗಳು ಅಭಿಪ್ರಾಯಪಟ್ಟಿದ್ದಾರೆ.

ಹಬ್ಬದ ರಿಯಾಯಿತಿ ಜತೆಗೆ ಜಿಎಸ್‌ಟಿ ದರ ಕಡಿತ ವಾಹನ ಖರೀದಿ ಹೆಚ್ಚಳಕ್ಕೆ ಕಾರಣವಾಗಿದೆ. ವಾಹನ ನೋಂದಣಿ ಪ್ರಕ್ರಿಯೆಗಳನ್ನು ಆನ್‌ಲೈನ್‌ನಲ್ಲಿ ನಡೆಸಲಾಗುತ್ತಿದ್ದು, ಈ ತಿಂಗಳ ಅಂತ್ಯದ ವೇಳೆಗೆ ಅನೇಕ ಬಾಕಿ ನೋಂದಣಿಗಳು ಪೂರ್ಣಗೊಳ್ಳುವ ನಿರೀಕ್ಷೆಯಿದೆ ಎಂದಿದ್ದಾರೆ ಸಂತೋಷ್‌ ಶೆಟ್ಟಿ, ಪ್ರಾದೇಶಿಕ ಸಾರಿಗೆ ಅಧಿಕಾರಿ, ಉಡುಪಿ”