ವಕ್ಫ್ ಕಾಯ್ದೆ ತಿದ್ದುಪಡಿ ಜಗ್ಗದ ಆಡಳಿತ ಮಂಡಳಿ: ವೆಲ್ಲೂರಿನಲ್ಲಿ 150 ಕುಟುಂಬಕ್ಕೆ ಜಾಗ ಖಾಲಿ ಮಾಡಿ, ಇಲ್ಲವೆ ದರ್ಗಾಕ್ಕೆ ತೆರಿಗೆ ಕಟ್ಟಿ, ನೋಟೀಸ್!

ವಿವಾದಿತ ಭೂಮಿ ದರ್ಗಾಗೆ ಸೇರಿದ್ದು ಮತ್ತು ವಕ್ಫ್ ಮಂಡಳಿಯ ಒಡೆತನದಲ್ಲಿದೆ ಎಂದು ಅದು ಹೇಳಿಕೊಂಡಿದೆ. ವೆಲ್ಲೂರು ಬಳಿಯ ಕಟ್ಟುಕೊಳ್ಳೈ ಗ್ರಾಮದಲ್ಲಿ ಭೂ ಮಾಲೀಕತ್ವದ ವಿವಾದ ಭುಗಿಲೆದ್ದಿದ್ದು, 150ಕ್ಕೂ ಹೆಚ್ಚು ಕುಟುಂಬಗಳಿಗೆ ತಮ್ಮ ಆಸ್ತಿ ವಕ್ಫ್ ಭೂಮಿ ಎಂದು ಹೇಳಿಕೊಂಡು ನೋಟಿಸ್ ನೀಡಲಾಗಿದೆ.

ವಿರಿಂಚಿಪುರಂನಲ್ಲಿರುವ ಸೈಯದ್ ಅಲಿ ಸುಲ್ತಾನ್ ಶಾ ದರ್ಗಾ ಹೊರಡಿಸಿರುವ ಈ ನೋಟಿಸ್‌ನಲ್ಲಿ ನಿವಾಸಿಗಳು ಭೂಮಿಯನ್ನು ಖಾಲಿ ಮಾಡಬೇಕು ಅಥವಾ ದರ್ಗಾ ಅಧಿಕಾರಿಗಳಿಗೆ ತೆರಿಗೆ ಪಾವತಿಸಲು ಪ್ರಾರಂಭಿಸಬೇಕು ಎಂದು ಒತ್ತಾಯಿಸಲಾಗಿದೆ.

ನೋಟಿಸ್ ಪ್ರಕಾರ, ಗ್ರಾಮಸ್ಥರು ವಕ್ಫ್ ಮಂಡಳಿಯೊಂದಿಗೆ ಔಪಚಾರಿಕ ಒಪ್ಪಂದವನ್ನು ಮಾಡಿಕೊಂಡು ದರ್ಗಾ ಆಡಳಿತ ಮಂಡಳಿಗೆ ಬಾಡಿಗೆ ಪಾವತಿಸಲು ಪ್ರಾರಂಭಿಸುವಂತೆ ತಿಳಿಸಲಾಗಿದೆ. ತಪ್ಪಿದಲ್ಲಿ, ಭೂಮಿಯನ್ನು ಅತಿಕ್ರಮಣ ಆಸ್ತಿ ಎಂದು ಪರಿಗಣಿಸಿ ವಕ್ಫ್ ಕಾನೂನುಗಳ ಅಡಿಯಲ್ಲಿ ವಾಪಸ್ ಪಡೆಯಲಾಗುವುದು.

ಇದು ಗ್ರಾಮದ ಸುಮಾರು 150 ಕುಟುಂಬಗಳಲ್ಲಿ ಕೋಪಕ್ಕೆ ಕಾರಣವಾಗಿದೆ. ಅವರು ಸಂಪೂರ್ಣವಾಗಿ ಕೃಷಿಯ ಮೇಲೆ ಅವಲಂಬಿತರಾಗಿದ್ದಾರೆ ಮತ್ತು ನಾಲ್ಕು ತಲೆಮಾರುಗಳಿಂದ ಈ ಭೂಮಿಯಲ್ಲಿ ವಾಸಿಸುತ್ತಿದ್ದೇವೆ ಎಂದು ಹೇಳಿಕೊಳ್ಳುತ್ತಾರೆ

ಆಕ್ರೋಶಗೊಂಡ ಗ್ರಾಮಸ್ಥರು ವೆಲ್ಲೂರು ಜಿಲ್ಲಾಧಿಕಾರಿ ಕಚೇರಿಗೆ ಮೆರವಣಿಗೆ ನಡೆಸಿ, ಸರ್ಕಾರ ತಕ್ಷಣ ಮಧ್ಯಪ್ರವೇಶಿಸಬೇಕೆಂದು ಒತ್ತಾಯಿಸಿ ಮನವಿ ಪತ್ರ ಸಲ್ಲಿಸಿದರು.

ಭೂಮಾಲೀಕತ್ವದ ವಿವಾದದ ಬಗ್ಗೆ ಭದ್ರತೆ ಮತ್ತು ಸ್ಪಷ್ಟತೆಗಾಗಿ ನಿವಾಸಿಗಳು ಒತ್ತಾಯಿಸಿದಾಗ ಹಿಂದೂ ಸಂಘಟನೆಯ ಬೆಂಬಲದೊಂದಿಗೆ ಪ್ರತಿಭಟನೆ ನಡೆಯಿತು. ಅವರಲ್ಲಿ ಹಲವರು ಸರ್ಕಾರ ನೀಡಿದ ಅಧಿಕೃತ ಭೂ ದಾಖಲೆಗಳನ್ನು ಹೊಂದಿದ್ದಾರೆ ಎಂದು ಅವರು ಹೇಳಿದರು.


ಈ ಭೂಮಿ ನಮ್ಮ ಏಕೈಕ ಜೀವನೋಪಾಯದ ಮೂಲವಾಗಿದೆ. ಈಗ ಅದನ್ನು ಖಾಲಿ ಮಾಡಲು ಅಥವಾ ದರ್ಗಾಕ್ಕೆ ಬಾಡಿಗೆ ಪಾವತಿಸಲು ನಮ್ಮನ್ನು ಕೇಳಲಾಗುತ್ತಿದೆ ಎಂದು ಸ್ಥಳೀಯ ರೈತರು ಹೇಳಿದರು. ಇದು ಭಯ ಮತ್ತು ಗೊಂದಲದ ಪರಿಸ್ಥಿತಿಯನ್ನು ಸೃಷ್ಟಿಸಿದೆ.

ಗ್ರಾಮದ ನಿವಾಸಿಗಳು ಇದಕ್ಕೆ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದ್ದು, ತಾವು ತಲೆಮಾರುಗಳಿಂದ ಈ ಭೂಮಿಯಲ್ಲಿ ವಾಸಿಸುತ್ತಿದ್ದೇವೆ, ತೆರಿಗೆ ಪಾವತಿಸುತ್ತಿದ್ದೇವೆ ಮತ್ತು ಮಾನ್ಯ ನೋಂದಣಿ ದಾಖಲೆಗಳನ್ನು ಹೊಂದಿದ್ದೇವೆ ಎಂದು ಹೇಳಿಕೊಂಡಿದ್ದಾರೆ.

ನಮ್ಮ ಭೂಮಿ ನೋಂದಣಿಯಾಗಿದೆ, ನಾವು ನೀರಿನ ತೆರಿಗೆ ಪಾವತಿಸಿದ್ದೇವೆ ಆದರೆ ಈಗ ಈ ಭೂಮಿ ವಕ್ಫ್ ಆಸ್ತಿ ಎಂದು ಹೇಳುವ ನೋಟಿಸ್ ನಮಗೆ ಬಂದಿದೆ” ಎಂದು ಗ್ರಾಮಸ್ಥರೊಬ್ಬರು ಹೇಳಿದ್ದಾರೆ.

2022ರಲ್ಲಿ ತಮಿಳುನಾಡು ವಕ್ಫ್ ಮಂಡಳಿಯು ತಿರುಚೆಂದುರೈನಲ್ಲಿ 1,500 ವರ್ಷಗಳಷ್ಟು ಹಳೆಯದಾದ ಚೋಳರ ಯುಗದ ದೇವಾಲಯ ಸೇರಿದಂತೆ ಸುಮಾರು 480 ಎಕರೆ ಭೂಮಿಯನ್ನು ತನ್ನದೆಂದು ಹೇಳಿಕೊಂಡಾಗ ಇದೇ ರೀತಿಯ ವಿವಾದ ಭುಗಿಲೆದ್ದಿತ್ತು.

ವಕ್ಫ್ ಮಂಡಳಿಯಿಂದ ಎನ್‌ಒಸಿ ಇಲ್ಲದೆ ತಮ್ಮ ಭೂಮಿಯನ್ನು ಮಾರಾಟ ಮಾಡಲು ಸಾಧ್ಯವಿಲ್ಲ ಎಂದು ಆ ಗ್ರಾಮದ ನಿವಾಸಿಗಳಿಗೆ ತಿಳಿಸಲಾಯಿತು. ಆದರೆ, ರಾಜ್ಯ ಸರ್ಕಾರದ ಮಧ್ಯಪ್ರವೇಶದ ನಂತರ ಈ ವಿಷಯ ಇತ್ಯರ್ಥವಾಯಿತು