ಬೆಂಗಳೂರು: ಸಾಹಿತ್ಯ ಕ್ಷೇತ್ರದಲ್ಲಿ ದೊಡ್ಡ ಹೆಸರು ಮಾಡಿರುವ ಹಾಗೂ ಓದುಗರ ದೊಡ್ಡ ಬಳಗವನ್ನೇ ಹೊಂದಿರುವ ಸಾಹಿತಿ ಪೂರ್ಣಚಂದ್ರ ತೇಜಸ್ವಿಯವರ ಸಾಹಿತ್ಯಲೋಕ, ಪರಿಸರ ಪ್ರೇಮವನ್ನು ಒಳಗೊಂಡ ‘ತೇಜಸ್ವಿ ವಿಸ್ಮಯ’ ಲಾಲ್ಬಾಗ್ನಲ್ಲಿ ಅನಾವರಣಗೊಳ್ಳಲಿದೆ !
ತೋಟಗಾರಿಕೆ ಇಲಾಖೆಯು ಲಾಲ್ಬಾಗ್ನಲ್ಲಿಈ ಬಾರಿ ಗಣರಾಜ್ಯೋತ್ಸವ ಅಂಗವಾಗಿ ನಡೆಯುವ ಫಲಪುಷ್ಪ ಪ್ರದರ್ಶನದಲ್ಲಿಹಿರಿಯ ಸಾಹಿತಿ ಪೂರ್ಣಚಂದ್ರ ತೇಜಸ್ವಿ ಅವರ ಕುರಿತ ವಸ್ತು ವಿಷಯ (ಥೀಮ್) ಆಧರಿಸಿ ಹತ್ತು ದಿನಗಳ ಪ್ರದರ್ಶನ ನಡೆಸಲು ನಿರ್ಧರಿಸಲಾಗಿದೆ.
‘ಪೂಚಂತೇ’ ಎಂದೇ ಹೆಸರಾದ ಪೂರ್ಣಚಂದ್ರ ತೇಜಸ್ವಿ ಅವರು ನಿಸರ್ಗದ ಒಂದು ಭಾಗವಾಗಿ ಬದುಕಿದವರು. ಹೀಗಾಗಿ, ಗಾಜಿನ ಮನೆಯಲ್ಲಿ ಬೆಟ್ಟದ ಮಾದರಿಯಲ್ಲಿ ನಿಸರ್ಗದ ಪ್ರತಿರೂಪ ನಿರ್ಮಿಸಲಾಗುವುದು. ನಿಸರ್ಗದತ್ತವಾಗಿ ತೇಜಸ್ವಿಯವರ ಮುಖ ಕಾಣುವಂತೆ ಮಾಡಿ, ಅದರ ಮಧ್ಯೆ ಜಲಪಾತ, ಝರಿಗಳನ್ನು ನಿರ್ಮಿಸಲಾಗುವುದು.
ತೇಜಸ್ವಿಯವರ ನೆಚ್ಚಿನ ಚಟುವಟಿಕೆಗಳಲ್ಲೊಂದಾದ ಮೀನು ಹಿಡಿಯುವುದು, ಜೇನುಗೂಡಿನ ಬಗ್ಗೆ ಅವರಿಗಿದ್ದ ಅಭಿರುಚಿಯ ಕುರಿತು ವಿಶೇಷ ಆಕರ್ಷಣೆಗಳಿರಲಿವೆ. ಜತೆಗೆ, ತೇಜಸ್ವಿಯವರ ನೆಚ್ಚಿನ ಶ್ವಾನ, ಪ್ರಾಣಿ, ಪಕ್ಷಿಗಳು, ಕೀಟಗಳನ್ನು ಹೂವುಗಳಲ್ಲಿ ಮೂಡಿಸಲು ಇಲಾಖೆ ಉದ್ದೇಶಿಸಿದೆ.
ಅಲ್ಲಲ್ಲಿ ಸೆಲ್ಫಿ ಪಾಯಿಂಟ್ಗಳು: ಉದ್ಯಾನದ ಆಯ್ದ ಜಾಗಗಳಲ್ಲಿ ಪೂರ್ಣಚಂದ್ರ ತೇಜಸ್ವಿಯವರ ಭಿನ್ನ ಕ್ಯಾರಿಕೇಚರ್ಗಳ ಸೆಲ್ಫಿ ಪಾಯಿಂಟ್ಗಳನ್ನು ನಿರ್ಮಿಸಲಾಗುತ್ತಧಿದೆ. ಅವರ ವ್ಯಕ್ತಿತ್ವದ ಚಿತ್ರಣವೇ ಹೂವುಗಳಲ್ಲಿಅರಳಿ ನಿಲ್ಲಲಿದೆ. ಜತೆಗೆ ತೇಜಸ್ವಿಯವರ ಕಾದಂಬರಿಗಳಲ್ಲಿಬರುವ ಪಾತ್ರಗಳನ್ನು ಪರಿಚಯ ಮಾಡಿಕೊಡಲಾಗುವುದು.
ತೇಜಸ್ವಿ ಅವರ ಪುಸ್ತಕಗಳ ಪ್ರದರ್ಶನ ಮತ್ತು ಮಾರಾಟ ನಡೆಯಲಿದೆ. 11 ದಿನಗಳ ಕಾಲ ತೇಜಸ್ವಿ ಅವರ ಬಗ್ಗೆ ನಾಟಕಗಳು, ಸಂವಾದ ನಡೆಯಲಿದೆ. ಜನವರಿ 15 ರಿಂದ 26ರವರೆಗೆ ಫಲಪುಷ್ಪ ಪ್ರದರ್ಶನ ನಡೆಯಲಿದೆ. ಬಗೆ ಬಗೆಯ ಹೂವುಗಳ ಆಕರ್ಷಣೆ ರೆಡ್ಹಾಟ್ ಪೋಕರ್, ಆಲ್ಸ್ಟೊ್ರೕಮೇರಿಯನ್ ಲಿಲ್ಲಿ, ಪೂಷಿಯಾ, ಅಗಪಾಂಥಸ್, ಸೈಕ್ಲೋಮನ್, ಕ್ಯಾಲಾಲಿಲ್ಲಿ, ಟ್ಯೊಬಿರಸ್ ರೂಟೆಡ್ ಸೇರಿದಂತೆ ಹಲವು ಶೀತ ವಲಯದ ವಿಶೇಷ ಹೂಗಳು ಪ್ರದರ್ಶನದಲ್ಲಿಇರಲಿವೆ.
ಈ ಬಾರಿಯ ಫಲಪುಷ್ಪ ಪ್ರದರ್ಶನವನ್ನು ‘ತೇಜಸ್ವಿ ವಿಸ್ಮಯ’ ಶೀರ್ಷಿಕೆಯಡಿ ಆಯೋಜಿಸಲು ನಿರ್ಧರಿಸಲಾಗಿದೆ. ಈ ಸಂಬಂಧ ಪೂರ್ಣಚಂದ್ರ ತೇಜಸ್ವಿಯವರೊಂದಿಗೆ ಒಡನಾಟ ಹೊಂದಿರುವ ವ್ಯಕ್ತಿಗಳು, ಸಂಸ್ಥೆಗಳು/ಟ್ರಸ್ಟ್ಗಳನ್ನು ಸಂಪರ್ಕಿಸಿ ಅಗತ್ಯ ಮಾಹಿತಿ ಸಂಗ್ರಹಿಸಲಾಗುತ್ತಿದೆ ಎಂದಿದ್ದಾರೆ ಡಾ. ಎಂ. ಜಗದೀಶ್, ಜಂಟಿ ನಿರ್ದೇಶಕರು, ತೋಟಗಾರಿಕೆ ಇಲಾಖೆ”
Leave a comment