40 ವರ್ಷಗಳ ಬಳಿಕ ಎಂಜಿ ರಸ್ತೆಯಲ್ಲಿ ನೀರು ಸರಬರಾಜು ಮತ್ತು ಒಳಚರಂಡಿ ಕೊಳವೆಗಳನ್ನು ಬದಲಾಯಿಸಲಿದೆ ಜಲಮಂಡಳಿ

ಬೆಂಗಳೂರು : 40 ವರ್ಷಗಳ ಬಳಿಕ ಎಂಜಿ ರಸ್ತೆಯಲ್ಲಿ ನೀರು ಸರಬರಾಜು ಮತ್ತು ಒಳಚರಂಡಿ ಕೊಳವೆಗಳನ್ನು ಬದಲಾಯಿಸಲಿದೆ ಜಲಮಂಡಳಿ ಜನವರಿಯಲ್ಲಿ ಗಣರಾಜ್ಯೋತ್ಸವದ ನಂತರ ಆರಂಭವಾಗಲಿದೆ ಈ ಮಹತ್ವದ ಕಾಮಗಾರಿ ಸವೆದು ಹೋದ ಕೊಳವೆಗಳನ್ನು ಬದಲಾಯಿಸಿ, ಸೋರಿಕೆ ಮತ್ತು ಮಾಲಿನ್ಯವನ್ನು ತಡೆಯಲು ಉದ್ದೇಶಿಸಿದೆ ಮಂಡಳಿ ಬೆಂಗಳೂರಿನ ಜನನಿಬಿಡ ರಸ್ತೆಗಳಲ್ಲಿ ಒಂದಾದ ಎಂಜಿ ರಸ್ತೆಯಲ್ಲಿ ಜಲಮಂಡಳಿ ರಿಪೇರಿ ಕಾಮಗಾರಿ ನಡೆಸಲು ಉದ್ದೇಶಿಸಿದೆ.

  ಬೆಂಗಳೂರು ಜಲಮಂಡಳಿಯು 40 ವರ್ಷಗಳ ಬಳಿಕ ಎಂ.ಜಿ ರಸ್ತೆಯಲ್ಲಿ ಸೋರಿಕೆ ನಿಯಂತ್ರಣಕ್ಕೆ ಕಾಮಗಾರಿ ನಡೆಸಲು ಸಜ್ಜಾಗಿದೆ. ಸೋರಿಕೆ ತಡೆಯಲು ಈಗಾಗಲೇ ನಾನಾ ಕಡೆ ಕಾಮಗಾರಿಗಳನ್ನು ಹಮ್ಮಿಕೊಂಡಿರುವ ಮಂಡಳಿ, ದೋಷಪೂರಿತ ಜಲಮಾಪನಗಳನ್ನೂ ಬದಲಾಯಿಸುತ್ತಿದೆ. ಹೊರ ಹರಿವನ್ನು ಕಂಡು ಹಿಡಿಯಲು ಬಲ್ಕ್‌ ಫ್ಲೋ ಮೀಟರ್‌ ಅಳವಡಿಸುತ್ತಿದೆ.

ಅಕ್ರಮ ಸಂಪರ್ಕಗಳನ್ನು ಪತ್ತೆ ಮಾಡುತ್ತಿದೆ. ಹಂತ- ಹಂತವಾಗಿ ವಿವಿಧೆಡೆ ಇರುವ ಹಳೆಯ ಕೊಳವೆಗಳನ್ನು ಬದಲಾಯಿಸುತ್ತಿದ್ದು, ಜನವರಿಯಲ್ಲಿ ಗಣರಾಜ್ಯೋತ್ಸವದ ನಂತರ ನಗರದ ಪ್ರಮುಖ ರಸ್ತೆಯಾದ ಎಂ.ಜಿ. ರಸ್ತೆಯಲ್ಲಿ ನೀರು ಸರಬರಾಜಿನ ಕೊಳವೆ ಬದಲಾವಣೆ ಮತ್ತು ಒಳಚರಂಡಿಗೆ ಸಂಬಂಧಿಸಿದ ಕಾಮಗಾರಿಗಳನ್ನು ನಡೆಸಲಿದೆ.

ಇಲ್ಲಿ ಪದೇ ಪದೆ ಸೋರಿಕೆ ಮತ್ತು ಮಾಲಿನ್ಯಕ್ಕೆ ಕಾರಣವಾಗಿರುವ ಸವೆದು ಹೋದ ನೀರು ಮತ್ತು ಒಳಚರಂಡಿ ಕೊಳವೆಗಳನ್ನು ಬದಲಾಯಿಸಲಿದೆ. ಈ ಯೋಜನೆಯಡಿ ಬ್ರಿಗೇಡ್‌ ರಸ್ತೆ ಮತ್ತು ಟ್ರಿನಿಟಿ ವೃತ್ತದ ನಡುವಿನ ರಸ್ತೆಯ ಎರಡೂ ಬದಿಗಳಲ್ಲಿ ಬೆಂಗಳೂರು ಜಲಮಂಡಳಿ ಹೊಸ ಕೊಳವೆ ಮಾರ್ಗಗಳನ್ನು ಅಳವಡಿಸಲಿದೆ. ಅನಿಲ್‌ ಕುಂಬ್ಳೆ ವೃತ್ತದ ಕಡೆಗೆ ಒಂದು ಬದಿಯನ್ನು ಮಾತ್ರ ಅಗೆಯಲಾಗುತ್ತದೆ.

ಸುಮಾರು 40 ವರ್ಷಗಳ ಹಿಂದೆ ಹಾಕಲಾಗಿದ್ದ ನೀರು ಸರಬರಾಜು ಮತ್ತು ಯುಜಿ ಕೊಳವೆಗಳು ಕಾಲಾನಂತರದಲ್ಲಿ ತುಕ್ಕು ಹಿಡಿದಿವೆ. ರಸ್ತೆಯಲ್ಲಿ ಹಲವೆಡೆ ಸಂಸ್ಥೆಗೆ ನಷ್ಟವಾಗುವ ರೀತಿಯಲ್ಲಿ ನೀರು ಸೋರಿಕೆಯಾಗುತ್ತಿದೆ. ಅಲ್ಲದೆ, ಯೋಜನೆಯ ಉದ್ದೇಶಿತ ಮಾರ್ಗದಲ್ಲಿರುವ ಮಿಲಿಟರಿ ಮತ್ತು ಪೊಲೀಸ್‌ ಅಧೀನದ ವಿವಿಧ ಕಟ್ಟಡಗಳಿಗೆ ನೀರು ಸರಬರಾಜಿನ ಸಂಪರ್ಕವನ್ನೂ ವಿಸ್ತರಿಸಬೇಕಿದೆ.

ಈ ಎಲ್ಲ ಕಾರಣಗಳಿಂದ ಇಲ್ಲಿನ ಕೊಳವೆಗಳ ಬದಲಾವಣೆ ಅತ್ಯಗತ್ಯವಾಗಿದೆ ಎಂದು ಮಂಡಳಿಯ ಮೂಲಗಳು ತಿಳಿಸಿವೆ. ಬೆಂಗಳೂರು ಕೇಂದ್ರ ನಗರ ಪಾಲಿಕೆ 2.2 ಕಿ.ಮೀ ಉದ್ದದ ಎಂ.ಜಿ. ರಸ್ತೆಯನ್ನು 45 ಕೋಟಿ ರೂ. ವೆಚ್ಚದಲ್ಲಿ ಕಾಂಕ್ರೀಟ್‌ ಮಾಡುವ ಪ್ರಸ್ತಾವನೆ ಮತ್ತು ಕೊಳವೆ ಬದಲಾವಣೆ ಕಾಮಗಾರಿಗಳಿಗೆ ನಿಕಟ ಸಂಬಂಧ ಹೊಂದಿವೆ.

ಈ ಹಿನ್ನೆಲೆಯಲ್ಲಿ ಎರಡೂ ಯೋಜನೆಗಳು ಪರಸ್ಪರ ಅವಲಂಬಿತವಾಗಿರುವುದರಿಂದ, ಮರು ಮೇಲ್ಮೈ ಕಾಂಕ್ರೀಟ್‌ ನಿರ್ಮಾಣಕ್ಕೂ ಮುನ್ನ ಜಲಮಂಡಳಿ ಕೊಳವೆ ಬದಲಾವಣೆಯ ಭೂಗತ ಕಾಮಗಾರಿಗಳನ್ನು ಪೂರ್ಣಗೊಳಿಸಬೇಕು. ಹೊಸ ವರ್ಷ ಮತ್ತು ಜನವರಿಯಲ್ಲಿನ ಹಬ್ಬದ ಸಮಯದಲ್ಲಿ ಈ ರಸ್ತೆಯಲ್ಲಿ ಜನಸಂದಣಿಯನ್ನು ಗಮನದಲ್ಲಿಟ್ಟುಕೊಂಡು ಕಾಂಕ್ರೀಟ್‌ ಕೆಲಸ ಮಾಡಲು ಪಾಲಿಕೆ ನಿರ್ಧರಿಸಿದೆ.

ಎಸ್‌ಎಂಎ ಚಿಂತನೆ ರಸ್ತೆ ಕಾಂಕ್ರೀಟ್‌ಗೆ ಸಂಬಂಧಿಸಿದಂತೆ ವೇಗವಾಗಿ ಪೂರ್ಣಗೊಳಿಸುವಿಕೆ ಮತ್ತು ದೀರ್ಘ ಬಾಳಿಕೆ ಬರಲಿದೆ ಎಂಬ ಹಿನ್ನೆಲೆಯಲ್ಲಿ ವೈಟ್‌-ಟಾಪಿಂಗ್‌ ಬದಲಿಗೆ ಸ್ಟೋನ್‌ ಮ್ಯಾಟ್ರಿಕ್ಸ್‌ ಆಸ್ಪಾಲ್ಟ್‌ (ಎಸ್‌ಎಂಎ) ಬಳಸುವ ಆಯ್ಕೆಯನ್ನು ಜಿಬಿಎ ಅಧಿಕಾರಿಗಳು ಪರಿಶೀಲಿಸಿದ್ದಾರೆ. ಎಂ.ಜಿ ರಸ್ತೆಯು ನಗರದ ಅತ್ಯಂತ ಜನನಿಬಿಡ ವಾಣಿಜ್ಯ ಕಾರಿಡಾರ್‌ಗಳಲ್ಲಿ ಒಂದಾಗಿರುವುದರಿಂದ, ಯೋಜನೆ ಪ್ರಾರಂಭವಾದ ನಂತರ ಗಮನಾರ್ಹ ಸಂಚಾರ ಅಡಚಣೆಗಳು ಉಂಟಾಗಬಹುದು.

ಬೆಂಗಳೂರಿನ ಪ್ರಮುಖ ರಸ್ತೆಗಳಲ್ಲಿ ಒಂದಾದ ಎಂ.ಜಿ ರಸ್ತೆಯಲ್ಲಿ ದಶಕಗಳಷ್ಟು ಹಳೆಯದಾದ ಮೂಲಸೌಕರ್ಯವನ್ನು ಮೇಲ್ದರ್ಜೆಗೇರಿಸುವಲ್ಲಿ ಈ ಕೆಲಸವು ನಿರ್ಣಾಯಕ ಹೆಜ್ಜೆಯಾಗಿದೆ. ಎಂ.ಜಿ ರಸ್ತೆಯಲ್ಲಿ ಬರುವ ಮಿಲಿಟರಿ ಮತ್ತು ಪೊಲೀಸ್‌ ಅಧೀನದ ವಿವಿಧ ಕಟ್ಟಡಗಳಿಂದ ಹೆಚ್ಚಿನ ನೀರಿಗೆ ಬೇಡಿಕೆ ಇದೆ. ಹೀಗಾಗಿ, ನೀರು ಸರಬರಾಜು ಮಾಡಬೇಕಿದೆ.

ಅಲ್ಲದೆ, ಇಲ್ಲಿ ಒಂದಷ್ಟು ಯುಜಿ ಕೆಲಸಗಳು ಇವೆ. ಹಾಗಾಗಿ, ಇಲ್ಲಿ ಎರಡು ಕ್ರಾಸ್‌ಗಳಲ್ಲಿ ನೀರು ಸರಬರಾಜಿನ ಕೊಳವೆ ಬದಲಾವಣೆ ಮತ್ತು ಯುಜಿ ಕೆಲಸಗಳನ್ನು ಹಮ್ಮಿಕೊಳ್ಳಲು ನಿರ್ಧರಿಸಲಾಗಿದೆ. ಇದು 10ರಿಂದ 20 ದಿನಗಳಲ್ಲಿ ಮುಗಿಸಬಹುದಾದ ಕಾಮಗಾರಿಯಾಗಿದೆ ಎಂದು ಬೆಂಗಳೂರು ಜಲಮಂಡಳಿ ಅಧ್ಯಕ್ಷ ಡಾ.ರಾಮ್‌ ಪ್ರಸಾತ್‌ ಮನೋಹರ್‌ ತಿಳಿಸಿದ್ದಾರೆ.”