ಇನ್ಫೋಸಿಸ್‌ 20,000 ಹೊಸ ಪದವೀಧರರನ್ನು ನೇಮಿಸಿಕೊಳ್ಳುವ ಗುರಿಯನ್ನು ಪ್ರಕಟಿಸಿದೆ

ಪ್ರಸಕ್ತ ಹಣಕಾಸು ವರ್ಷದಲ್ಲಿ 20,000 ಹೊಸಬರ ನೇಮಕದ ಗುರಿ ಹಾಕಿಕೊಂಡ ಇನ್ಫೋಸಿಸ್‌ ಎರಡನೇ ತ್ರೈಮಾಸಿಕದಲ್ಲಿ 7,364 ಕೋಟಿ ರೂ. ನಿವ್ವಳ ಲಾಭ, ಶೇ. 13.2ರಷ್ಟು ಹೆಚ್ಚಳ ಪ್ರತಿ ಷೇರಿಗೆ 23 ರೂ. ಮಧ್ಯಂತರ ಲಾಭಾಂಶ ಘೋಷಣೆ ಮಾಡಿದ ಟೆಕ್‌ ಕಂಪನಿ ಉದ್ಯೋಗಿಗಳ ವಲಸೆ ಪ್ರಮಾಣ ಕಳೆದ 12 ತಿಂಗಳಲ್ಲಿ ಶೇ. 14.3ಕ್ಕೆ ಇಳಿಕೆ ಇನ್ಫೋಸಿಸ್‌ನ ಆದಾಯ, ಲಾಭದಲ್ಲಿ ಏರಿಕೆಯಾಗಿದ್ದು, ನೇಮಕಾತಿಯನ್ನೂ ಹೆಚ್ಚಿಸಿದೆ.

ಬೆಂಗಳೂರು: ದೇಶದ ಎರಡನೇ ಅತಿದೊಡ್ಡ ಐಟಿ ಸೇವಾ ಕಂಪನಿ ಇನ್ಫೋಸಿಸ್, 2026ನೇ ಹಣಕಾಸು ವರ್ಷದ ಎರಡನೇ ತ್ರೈಮಾಸಿಕದ (ಜುಲೈ – ಸೆಪ್ಟೆಂಬರ್) ಫಲಿತಾಂಶವನ್ನು ಗುರುವಾರ ಪ್ರಕಟಿಸಿದ್ದು, ನಿವ್ವಳ ಲಾಭದಲ್ಲಿ ಶೇ. 13.2ರಷ್ಟು ಭಾರೀ ಏರಿಕೆ ದಾಖಲಿಸಿದೆ. ಇದೇ ವೇಳೆ, ಪ್ರಸಕ್ತ ಹಣಕಾಸು ವರ್ಷದಲ್ಲಿ ಬರೋಬ್ಬರಿ 20,000 ಹೊಸ ಪದವೀಧರರನ್ನು (ಫ್ರೆಶರ್‌) ನೇಮಿಸಿಕೊಳ್ಳುವುದಾಗಿ ಘೋಷಿಸಿರುವ ಕಂಪನಿ ಈಗಾಗಲೇ ದೊಡ್ಡ ಸಂಖ್ಯೆಯ ಉದ್ಯೋಗಿಗಳನ್ನು ನೇಮಕವೂ ಮಾಡಿಕೊಂಡಿದೆ.

ಈ ಮೂಲಕ ಉದ್ಯೋಗಾಕಾಂಕ್ಷಿಗಳಿಗೆ ಸಿಹಿ ಸುದ್ದಿ ನೀಡಿದೆ. ಕಂಪನಿಯು ಎರಡನೇ ತ್ರೈಮಾಸಿಕದಲ್ಲಿ 7,364 ಕೋಟಿ ರೂ. ಏಕೀಕೃತ ನಿವ್ವಳ ಲಾಭ ಗಳಿಸಿದ್ದು, ಕಳೆದ ವರ್ಷ ಇದೇ ಅವಧಿಗೆ ಹೋಲಿಸಿದರೆ ಶೇ. 13.2ರಷ್ಟು ಹೆಚ್ಚಳವಾಗಿದೆ. ಕಂಪನಿಯ ಆದಾಯವು ಶೇ. 8.6ರಷ್ಟು ಏರಿಕೆಯಾಗಿ 44,490 ಕೋಟಿ ರೂ.ಗೆ ತಲುಪಿದೆ. ಸ್ಥಿರವಾದ ಒಪ್ಪಂದಗಳು ಮತ್ತು ಉತ್ತಮ ನಗದು ಹರಿವಿನಿಂದಾಗಿ ಕಂಪನಿಯು ನಿರೀಕ್ಷೆಗಿಂತ ಉತ್ತಮ ಪ್ರದರ್ಶನ ನೀಡಿದೆ.   

ನೇಮಕಾತಿಯಲ್ಲಿ ಹೊಸ ಹುರುಪು ನೇಮಕಾತಿ ಕುರಿತು ಮಾಹಿತಿ ನೀಡಿರುವ ಇನ್ಫೋಸಿಸ್ ಸಿಎಫ್‌ಒ ಜಯೇಶ್ ಸಂಘರಾಜ್ಕಾ, “ಹಣಕಾಸು ವರ್ಷದ ಮೊದಲಾರ್ಧದಲ್ಲಿ ಈಗಾಗಲೇ 12,000 ಫ್ರೆಷರ್‌ಗಳನ್ನು ನೇಮಿಸಿಕೊಂಡಿದ್ದೇವೆ. ವರ್ಷದ ಆರಂಭದಲ್ಲಿ 15,000 – 20,000 ನೇಮಕಾತಿಯ ಗುರಿ ಹೊಂದಿದ್ದೆವು. ಈಗ ನಮ್ಮ ಗುರಿಯನ್ನು ಪರಿಷ್ಕರಿಸಿ, ಒಟ್ಟು 20,000 ಹೊಸಬರನ್ನು ನೇಮಿಸಿಕೊಳ್ಳುವ ಹಾದಿಯಲ್ಲಿದ್ದೇವೆ” ಎಂದು ತಿಳಿಸಿದ್ದಾರೆ.

ಎರಡನೇ ತ್ರೈಮಾಸಿಕದಲ್ಲಿ 8,203 ಹೊಸ ಉದ್ಯೋಗಿಗಳನ್ನು ಸೇರ್ಪಡೆ ಮಾಡಿಕೊಳ್ಳಲಾಗಿದ್ದು, ಕಂಪನಿಯ ಒಟ್ಟು ಉದ್ಯೋಗಿಗಳ ಸಂಖ್ಯೆ 3,31,991ಕ್ಕೆ ಏರಿಕೆಯಾಗಿದೆ ಅವರು ಮಾಹಿತಿ ನೀಡಿದ್ದಾರೆ. ವಲಸೆ ಪ್ರಮಾಣ ಇಳಿಕೆ, ಪ್ರತಿಸ್ಪರ್ಧಿಗಳಿಗೆ ಪೈಪೋಟಿ ಇನ್ನು ಕಂಪನಿ ಪಾಲಿಗೆ ಸಕಾರಾತ್ಮಕ ಬೆಳವಣಿಗೆಯೆಂದರೆ, ಹೆಚ್ಚಿನ ಉದ್ಯೋಗಿಗಳನ್ನು ಉಳಿಸಿಕೊಳ್ಳುವಲ್ಲಿ ಇನ್ಫೋಸಿಸ್ ಯಶಸ್ವಿಯಾಗಿದೆ. ಉದ್ಯೋಗಿಗಳ ವಲಸೆ ಪ್ರಮಾಣ (ಅಟ್ರಿಷನ್‌) ಕಳೆದ ತ್ರೈಮಾಸಿಕದಲ್ಲಿದ್ದ ಶೇ. 14.4 ರಿಂದ ಶೇ. 14.3ಕ್ಕೆ ಇಳಿಕೆಯಾಗಿದೆ.

ಕೃತಕ ಬುದ್ಧಿಮತ್ತೆ (ಎಐ) ಮತ್ತು ಕ್ಲೌಡ್ ಕಂಪ್ಯೂಟಿಂಗ್‌ ಮೇಲಿನ ಕಾರ್ಪೊರೇಟ್ ಕಂಪನಿಗಳ ವೆಚ್ಚಗಳು ಹೆಚ್ಚುತ್ತಿದ್ದು, ಉದ್ಯಮದಲ್ಲಿನ ಬೆಳವಣಿಗೆಯ ಬಗ್ಗೆ ಇನ್ಫೋಸಿಸ್ ವಿಶ್ವಾಸ ವ್ಯಕ್ತಪಡಿಸಿದೆ. ಇನ್ನೊಂದೆಡೆ ಪ್ರತಿಸ್ಪರ್ಧಿ ಟಾಟಾ ಕನ್ಸಲ್ಟೆನ್ಸಿ ಸರ್ವಿಸಸ್ (ಟಿಸಿಎಸ್‌) ಇತ್ತೀಚೆಗೆ ಶೇ. 2ರಷ್ಟು ಉದ್ಯೋಗಿಗಳ ಕಡಿತವನ್ನು ಘೋಷಿಸಿತ್ತು. ಆದರೆ ಇನ್ಫೋಸಿಸ್‌ ನೇಮಕಾರಿಗೆ ಒತ್ತು ನೀಡಿದೆ.

ಮತ್ತೊಂದು ಪ್ರತಿಸ್ಪರ್ಧಿ ಎಚ್‌ಸಿಎಲ್‌ಟೆಕ್, ವರ್ಷದ ಮೊದಲಾರ್ಧದಲ್ಲಿ 7,180 ಫ್ರೆಷರ್‌ಗಳನ್ನು ನೇಮಿಸಿಕೊಂಡಿದೆ. ಇನ್ನು ಒಟ್ಟಾರೆ, ಇನ್ಫೋಸಿಸ್‌ನ ಲಾಭ ಮತ್ತು ಆದಾಯವು ಮಾರುಕಟ್ಟೆ ವಿಶ್ಲೇಷಕರ ನಿರೀಕ್ಷೆಗಳನ್ನು ಮೀರಿಸಿದೆ. ಆದರೆ, ಕಾರ್ಯಾಚರಣೆಯ ಮಾರ್ಜಿನ್ ಶೇ. 21.3ರ ನಿರೀಕ್ಷೆಗೆ ಪ್ರತಿಯಾಗಿ ಶೇ. 21ರಷ್ಟು ದಾಖಲಾಗಿದ್ದು, ಈ ವಿಚಾರದಲ್ಲಿ ಕೊಂಚ ಹಿನ್ನಡೆಯನ್ನು ಕಂಡಿದೆ.”