ಹೆಚ್ಚಿನ ವಿದ್ಯಾಭ್ಯಾಸಕ್ಕೆ ಅಮೆರಿಕಕ್ಕೆ ತೆರಳುವ ಭಾರತೀಯ ವಿದ್ಯಾರ್ಥಿಗಳ ಸಂಖ್ಯೆ ಗಣನೀಯ ಕುಸಿತ

ಅಮೆರಿಕಕ್ಕೆ ಹೋಗುವ ಭಾರತೀಯ ವಿದ್ಯಾರ್ಥಿಗಳ ಸಂಖ್ಯೆಯಲ್ಲಿ ಇಳಿಮುಖ. ಭಾರತೀಯ ವಿದ್ಯಾರ್ಥಿಗಳನ್ನು ದೂರ ಮಾಡಿಕೊಂಡ ಡೊನಾಲ್ಡ್‌ ಟ್ರಂಪ್‌ ಆಡಳಿತ. ಅಮೆರಿಕದ ಬದಲು ಮತ್ತೊಂದು ದೇಶವನ್ನು ಆಯ್ದುಕೊಂಡ ಭಾರತೀಯ ವಿದ್ಯಾರ್ಥಿಗಳು. ವಾಷಿಂಗ್ಟನ್‌ ಡಿಸಿ: ತುಂಬಾ ಇತ್ತೀಚಿನವರೆಗೂ ಅಮೆರಿಕ ಎಂದರೆ ಲಕ್ಷಾಂತರ ಭಾರತೀಯರ ಕನಸಿನ ರಾಷ್ಟ್ರವಾಗಿತ್ತು.

ಅಮೆರಿಕದಲ್ಲಿ ಶಿಕ್ಷಣ ಪಡೆಯುವ, ಅಮೆರಿಕದಲ್ಲಿ ಉದ್ಯೋಗ ಪಡೆಯುವ ಮತ್ತು ಅಮೆರಿಕದಲ್ಲಿ ಉತ್ತಮ ಜೀವನ ಕಂಡುಕೊಳ್ಳುವ ಕನಸು ಹೊತ್ತು, ಅದೆಷ್ಟು ಲಕ್ಷ ಭಾರತೀಯರು ಊರು ಬಿಟ್ಟರೋ ತಿಳಿಯದು. ಆದರೆ ಭಾರತೀಯರ ಪಾಲಿಗೆ ಅಮೆರಿಕ ಈಗ ಆ ಕನಸಿನ ರಾಷ್ಟ್ರವಾಗಿ ಉಳಿದಿಲ್ಲ. ಅಮೆರಿಕವನ್ನು ಕೆಟ್ಟ ಕನಸು ಎಂದು ಮರೆಯಲು ಭಾರತೀಯರು ಸಜ್ಜಾಗಿದ್ದಾರೆ.

ಏಕೆ ಹೀಗೆ? ಹೌದು, ಈ ವರ್ಷ ಅಮೆರಿಕಕ್ಕೆ ಪ್ರಯಾಣಿಸುವ ಭಾರತೀಯ ವಿದ್ಯಾರ್ಥಿಗಳ ಸಂಖ್ಯೆ ಗಣನೀಯವಾಗಿ ಕುಸಿತ ಕಂಡಿದೆ. ಇದು ಸಾಂಕ್ರಾಮಿಕ ರೋಗದ ಹೊರತಾಗಿ ದಾಖಲೆಯ ಕುಸಿತ ಕಂಡಿರುವ ವರ್ಷವಾಗಿದೆ. “ದಿ ನ್ಯೂಯಾರ್ಕ್‌ ಟೈಮ್ಸ್‌” ವಿಶ್ಲೇಷಿಸಿದ Trade.gov ದತ್ತಾಂಶ ಪ್ರಕಾರ ಕಳೆದ ವರ್ಷದ ಇದೇ ಅವಧಿಗೆ ಹೋಲಿಸಿದರೆ, ಆಗಸ್ಟ್‌ 2025ರಲ್ಲಿ ಭಾರತದಿಂದ ವಿದ್ಯಾರ್ಥಿಗಳ ಆಗಮನವು ಶೇ.44ರಷ್ಟು ಕಡಿಮೆಯಾಗಿದೆ.

ಉನ್ನತ ಶಿಕ್ಷಣ ಬಯಸುವ ಭಾರತೀಯ ವಿದ್ಯಾರ್ಥಿಗಳಿಗೆ ಅದರಲ್ಲೂ ವಿಶೇಷವಾಗಿ ವಿಜ್ಞಾನ, ತಂತ್ರಜ್ಞಾನ, ಎಂಜಿನಿಯರಿಂಗ್‌ ಮತ್ತು ಗಣಿತ (STEM) ಕ್ಷೇತ್ರಗಳಿಗೆ, ಅಮೆರಿಕ ಬಹಳ ಹಿಂದಿನಿಂದಲೂ ಆದ್ಯತೆಯ ರಾಷ್ಟ್ರವಾಗಿದೆ. ಆದರೆ ಈ ವರ್ಷದ ದತ್ತಾಂಶವು ವಿಭಿನ್ನ ಕಥೆಯೊಂದನ್ನು ಹೇಳುತ್ತಿದೆ. ಇದಕ್ಕೆ ಬಹುತೇಕ ಟ್ರಂಪ್‌ ಅವರ ಇಂಡಿಯಾಫೋಬಿಯಾ ಕಾರಣವಾಗಿದೆ.

ಅಮೆರಿಕಕ್ಕೆ ಒಟ್ಟಾರೆ ಅಂತಾರಾಷ್ಟ್ರೀಯ ವಿದ್ಯಾರ್ಥಿಗಳ ಆಗಮನ ಶೇ. 19ರಷ್ಟು ಕುಸಿದಿದೆ. ಭಾರತೀಯರಲ್ಲಿ ಈ ಕುಸಿತ ಜಾಗತಿಕ ಸರಾಸರಿಗಿಂತ ಹೆಚ್ಚಾಗಿದೆ. ಅಮೆರಿಕದಲ್ಲಿ ಪ್ರಸ್ತುತ 1.3 ಮಿಲಿಯನ್‌ಗಿಂತಲೈ ಹೆಚ್ಚು ಅಂತಾರಾಷ್ಟ್ರೀಯ ವಿದ್ಯಾರ್ಥಿಗಳು ಅಧ್ಯಯನ ಮಾಡುತ್ತಿದ್ದು, ಪ್ರಸ್ತುತ ಕಂಡುಬರುತ್ತಿರುವ ಕುಸಿತವು ರಚನಾತ್ಮಕ ಬದಲಾವಣೆಗಯನ್ನು ಸೂಚಿಸುತ್ತದೆ.

ಇದು ವಿಶ್ವವಿದ್ಯಾಲಯಗಳನ್ನೂ ಒಳಗೊಂಡಂತೆ, ಅಮೆರಿಕದ ಆರ್ಥಿಕತೆ ಮೇಲೆ ಪರಿಣಾಮ ಬೀರಬಹುದು. ಏನು ಕಾರಣ? 1. ವೀಸಾ ವಿಳಂಬ: ಕಳೆದ ಮೇ ತಿಂಗಳಲ್ಲಿ ಯುಎಸ್‌ ಸ್ಟೇಟ್‌ ಡಿಪಾರ್ಟ್‌ಮೆಂಟ್‌ ವಿದ್ಯಾರ್ಥಿ ವೀಸಾ ಸಂದರ್ಶನಗಳನ್ನು ಮೂರು ವಾರಗಳ ಕಾಲ ಸ್ಥಗಿತಗೊಳಿಸಿತ್ತು. ಸಂದರ್ಶನಗಳು ಪುನರಾರಂಭವಾದಾಗ ಕಾಯುವ ಮಿತಿ ತಿಂಗಳುಗಳವರೆಗೆ ವಿಸ್ತರಿಸಿತು. ಪರಿಣಾಮವಾಗಿ ಅನೇಕ ಭಾರತೀಯ ವಿದ್ಯಾರ್ಥಿಗಳು ಶರತ್ಕಾಲದ ಸೆಮಿಸ್ಟರ್‌ ಸಮಯಕ್ಕೆ ಸರಿಯಾಗಿ ತಮ್ಮ F-1 ವೀಸಾಗಳನ್ನು ಪಡೆಯಲು ಸಾಧ್ಯವಾಗಲಿಲ್ಲ.

ಇದೇ ಅವಧಿಯ ದತ್ತಾಂಶವು ಕಳೆದ ವರ್ಷಕ್ಕೆ ಹೋಲಿಸಿದರೆ, F-1 ವೀಸಾ ವಿತರಣೆಯಲ್ಲಿ ಶೇ.22ರಷ್ಟು ಕುಸಿತವನ್ನು ತೋರಿಸುತ್ತವೆ. 2. ಕಠಿಣ ವಲಸೆ ವಾತಾವರಣ: ಅಮೆರಿ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಅವರ ವಲಸೆ ವಿರೋಧಿ ನೀತಿ ಅನಿಶ್ಚಿತತೆಯನ್ನು ಮತ್ತಷ್ಟು ಹೆಚ್ಚಿಸಿದೆ. 2025ರಲ್ಲಿ ಅಮೆರಿಕವು 19 ದೇಶಗಳ ಮೇಲೆ ಹೊಸ ಪ್ರಯಾಣ ನಿಷೇಧ ಮತ್ತು ವೀಸಾ ನಿರ್ಬಂಧವನ್ನು ಘೋಷಿಸಿದೆ. ಅಲ್ಲದೇ ಎಲ್ಲಾ ವೀಸಾ ಅರ್ಜಿದಾರರ ಪರಿಶೀಲನೆ ಪ್ರಕ್ರಿಯೆಯನ್ನು ಬಿಗಿಗೊಳಿಸಿದೆ. ವೀಸಾ ಅರ್ಜಿದಾರರು ತಮ್ಮ ಸಮಗ್ರ ಪರಿಶೀಲನೆಗಾಗಿ ತಮ್ಮ ಸಾಮಾಜಿಕ ಮಾಧ್ಯಮಗಳ ಮಾಹಿತಿ ನೀಡಬೇಕಾಗುತ್ತದೆ.

ಅಂದರೆ ಅಮೆರಿಕಕ್ಕೆ ಹೋಗಬಯಸುವವರು ತಮ್ಮ ಸಾಮಾಜಿಕ ಜಾಲತಾಣಗಳ ಮಾಹಿತಿಯನ್ನು ಸಾರ್ವಜನಿಕಗೊಳಿಸಬೇಕಾಗುತ್ತದೆ. ಇದೇ ಕಾರಣಕ್ಕೆ ಟ್ರಂಪ್‌ ಆಡಳಿತವು 1,500ಕ್ಕೂ ಹೆಚ್ಚು ವಿದ್ಯಾರ್ಥಿ ವೀಸಾಗಳನ್ನು ರದ್ದುಗೊಳಿಸಿದೆ. ಈ ವಿಚಾರದಲ್ಲಿ ಅಮೆರಿಕವು ಭಾರತವನ್ನು ಗುರಿಯಾಗಿಸಿಲ್ಲವಾದರೂ, ಅನುಮಾನ ಮತ್ತು ಅನಿಶ್ಚಿತತೆಯ ವಾತಾವರಣವು ಎಲ್ಲಾ ವಿದೇಶಿ ವಿದ್ಯಾರ್ಥಿಗಳಂತೆ ಭಾರತೀಯ ವಿದ್ಯಾರ್ಥಿಗಳ ಮೇಲೂ ಪರಿಣಾಮ ಬೀರಿದೆ. 3. ಕ್ಯಾಂಪಸ್‌ಗಳಲ್ಲಿ ಭಯದ ವಾತಾವರಣ: ಅಮೆರಿಕದ ವಿವಿಧ ವಿಶ್ವವಿದ್ಯಾಲಯಗಳಲ್ಲ ವ್ಯಾಸಾಂಗ ಮಾಡುವ ವಿದೇಶಿ ವಿದ್ಯಾರ್ಥಿಗಳ ವಿರುದ್ಧ, ಟ್ರಂಪ್‌ ಆಡಳಿತವು ಸರಣಿ ಕಠಿಣ ಕ್ರಮಗಳನ್ನು ಕೈಗೊಂಡಿದೆ.

ಪ್ಯಾಲೆಸ್ಟೈನ್‌ ಪರ ಪ್ರತಿಭಟನೆ ಮಾಡುವುದನ್ನು ಅಕ್ರಮ ಎಂದು ಕರೆದಿರುವ ಟ್ರಂಪ್‌ ಆಡಳಿತ, ಇಂತಹ ಪ್ರತಿಭಟನೆಗಳಲ್ಲಿ ಭಾಗವಹಿಸಿದ ವಿದೇಶಿ ವಿದ್ಯಾರ್ಥಿಗಳ ವೀಸಾ ರದ್ದು ಮಾಡಿದೆ. ಈ ಕಠಿಣ ಕ್ರಮಗಳು ಸಹಜವಾಗಿ ಅಮೆರಿಕಕ್ಕೆ ಹೋಗಬಸುವ ಭಾರತೀಯ ವಿದ್ಯಾರ್ಥಿಗಳ ಆತಂಕವನ್ನು ಹೆಚ್ಚಿಸಿದೆ. 4. ಏರುತ್ತಿರುವ ವೆಚ್ಛಗಳು: ಇತ್ತೀಚಿಗೆ ಡೊನಾಲ್ಡ್‌ ಟ್ರಂಪ್‌ ಅವರು H-1B ವೀಸಾ ಅರ್ಜಿ ಶುಲ್ಕ ಹೆಚ್ಚಳ ಮಾಡುವ ಕಾರ್ಯಕಾರಿ ಆದೇಶಕ್ಕೆ ಸಹಿ ಹಾಕಿದ್ದಾರೆ. ಇದು ಅಮೆರಿಕದಲ್ಲಿ ಉದ್ಯೋಗ ಮಾಡುವ ವಿದೇಶಿ ಪದವಿಧರರ ಕನಸನ್ನು ಭಗ್ನಗೊಳಿಸಿದೆ.

ಭಾರತೀಯ ವಿದ್ಯಾರ್ಥಿಗಳ ನೆಕ್ಸ್ಟ್‌ ಸ್ಟಾಪ್‌ ಯಾವುದು?    ಅಮೆರಿಕದ ಈ ಕಠಿಣ ನಿಲುವುಗಳು ಭಾರತೀಯ ವಿದ್ಯಾರ್ಥಿಗಳನ್ನು ಅನ್ಯ ದೇಶಗಳತ್ತ ನೋಡುವಂತೆ ಮಾಡಿದೆ. ಕೆನಡಾ, ಜರ್ಮನಿ, ಯುಕೆ ಮತ್ತು ಆಸ್ಟ್ರೇಲಿಯಾ ದೇಶಗಳತ್ತ ಭಾರತೀಯ ವಿದ್ಯಾರ್ಥಿಗಳು ಮುಖ ಮಾಡಿದ್ದು, ಅಲ್ಲಿನ ವಿಶ್ವವಿದ್ಯಾಲುಗಳಲ್ಲಿ ಭಾರತೀರ ಸಂಖ್ಯೆ ದಿನದಿಂದ ದಿನಕ್ಕೆ ಹೆಚ್ಚುತ್ತಿದೆ. ಇದೇ ಕಾರಣಕ್ಕೆ ಇತ್ತೀಚಿಗೆ ಭಾರತೀಯ ಟೆಕ್ಕಿಗಳಿಗೆ ಆಹ್ವಾನ ನೀಡಿ ಜರ್ಮನಿ ಪ್ರಕಟಣೆ ಹೊರಡಿಸಿತ್ತು. ಇದರಲ್ಲಿ ಅಮೆರಿಕದ ವೀಸಾ ನಿಯಮ ಗೇಲಿ ಮಾಡಿದ್ದ ಜರ್ಮನಿ, “ನಮ್ಮ ವೀಸಾ ನೀತಿ ರಾತ್ರೋರಾತ್ರಿ ಬದಲಾಗಲ್ಲ” ಎಂದು ಹೇಳಿತ್ತು. ಅದೇ ರೀತಿ ಕೆನಡಾ ಕೂರ ಭಾರತೀಯ ವಿದ್ಯಾರ್ಥಿಗಳನ್ನು ಸೆಳೆಯಲು ತನ್ನ ವೀಸಾ ನಿಯಮವನ್ನು ಸಡಿಲಗೊಳಿಸಲು ಮುಂದಾಗಿದೆ. ಯುಕೆ ಮತ್ತು ಆಸ್ಟ್ರೇಲಿಯಾ ಕೂಡ ಇದೇ ಹಾದಿ ಹಿಡಿದಿವೆ.

ಯುಎಸ್‌ ವಿವಿಗಳ ಗತಿ ಏನು? ಈ ಬೆಳವಣಿಗೆಗಳು ಅಮೆರಿಕದ ವಿಶ್ವವಿದ್ಯಾಲಯಗಳ ಮೇಲೆ ಭಾರೀ ಪರಿಣಾಮ ಬೀರಿದೆ. ಅಮೆರಿಕದ ವಿವಿಧ ವಿಶ್ವವಿದ್ಯಾಲಯಗಳಲ್ಲಿ ವಿದೇಶಿ ವಿದ್ಯಾರ್ಥಿಗಳ ಸಂಖ್ಯೆ ಗಣನೀಯವಾಗಿ ಕುಸಿಯುತ್ತಿದೆ. ಸೆಂಟ್ರಲ್‌ ಮಿಸ್ಸೌರಿ ವಿಶ್ವವಿದ್ಯಾಲಯದಲ್ಲಿ ವಿದೇಶಿ ವಿದ್ಯಾರ್ಥಿಗಳ ಸಂಖ್ಯೆ ಅರ್ಧದಷ್ಟು ಕುಸಿದಿದ್ದರೆ, ಶಿಕಾಗೋದ ಡಿಪೌಲ್‌ ವಿವಿಯಲ್ಲಿ ವಿದೇಶಿ ವಿದ್ಯಾರ್ಥಿಗಳ ಸಂಖ್ಯೆ ಶೇ. 62ರಷ್ಟು ಕುಸಿದಿದೆ. ಅದೇ ರೀತಿ ಇಂಡಿಯಾನಾ ಮತ್ತು ಓಹಿಯೊ ವಿವಿಗಳಲ್ಲೂ ವಿದೇಶಿ ವಿದ್ಯಾರ್ಥಿಗಳ ಸಂಖ್ಯೆ ಶೇ. 30ರಿಂದ ಶೇ. 40ರಷ್ಟು ಕುಸಿತ ಕಂಡಿದೆ. ಅಲ್ಲದೇ ಈ ಸಂಖ್ಯೆ ಮತ್ತಷ್ಟು ಹೆಚ್ಚಲಿದೆ ಎಂದು ಅಮೆರಿಕದ ಶಿಕ್ಷಣ ತಜ್ಞರು ಎಚ್ಚರಿಸಿದ್ದಾರೆ

ಯುಎಸ್‌ ಭವಿಷ್ಯದ ಮೇಲೆ ಪರಿಣಾಮ?                   ದಶಕಗಳಿಂದ ಅಮೆರಿಕದ ಶೈಕ್ಷಣಿಕ ವ್ಯವಸ್ಥೆಯಲ್ಲಿ ಭಾರತೀಯ ವಿದ್ಯಾರ್ಥಿಗಳ ಪ್ರಭಾವ ಇದೆ. ಆದರೆ ಏಕಾಏಕಿ ಈ ಪ್ರಭಾವ ಇದೀಗ ಕುಗ್ಗಿದ್ದು, ಇದು ಅಮೆರಿಕನ್‌ ಕಂಪನಿಗಳು ಕೌಶಲ್ಯಪೂರ್ಣ ವಿದೇಶಿ ಕಾರ್ಮಿಕರನ್ನು ಗುರುತಿಸಿ ಕೆಲಸಕ್ಕೆ ನೇಮಿಸಿಕೊಳ್ಳುವಲ್ಲಿಯೂ ಅಡೆತಡೆಯಾಗಿದೆ. ಅನ್ಯ ರಾಷ್ಟ್ರಗಳತ್ತ ಭಾರತೀಯ ವಿದ್ಯಾರ್ಥಿಗಳು ವಲಸೆ ಹೊರಟಿರುವುದನ್ನು, ಅಮೆರಿಕದ ವಿಶ್ವವಿದ್ಯಾಲಯಗಳು ಮತ್ತು ಅಮೆರಿಕದ ಕಂಪನಿಗಳು ಅಸಹಾಯಕರಾಗಿ ನೋಡುತ್ತಾ ನಿಂತಿವೆ. ಅಮೆರಿಕದಲ್ಲಿ ವಿದೇಶಿ ವಿದ್ಯಾರ್ಥಿಗಳ ಮನೆ ಬಾಗಿಲಿಗೆ ಅಧಿಕಾರಿಗಳು, STEM-OPTಯಲ್ಲಿರುವವರ ತಪಾಸಣೆ, ದಾಖಲೆಗಳಿಗೆ ಡಿಮ್ಯಾಂಡ್‌! ಒಟ್ಟಿನಲ್ಲಿ ಭಾರತೀಯರ ಅಮೆರಿಕದ ಕನಸು ಈಗ ಭಗ್ನಗೊಂಡಿದ್ದು, ಇದರಲ್ಲಿ ಭಾರತೀಯ ವಿದ್ಯಾರ್ಥಿಗಳ ಯಾವ ತಪ್ಪೂ ಇಲ್ಲ. ಟ್ರಂಪ್‌ ಆಡಳಿತ ಉದ್ದೇಶಪೂರ್ವಕವಾಗಿ ವಿದೇಶಿ ವಿದ್ಯಾರ್ಥಿಗಳು ಮತ್ತು ಕಾರ್ಮಿಕರನ್ನು ದೂರ ತಳ್ಳುತ್ತಿದ್ದು, ಇದು ಮುಂದಿನ ದಿನಗಳಲ್ಲಿ ಅಮೆರಿಕದ ಆಋಥಿಕತೆ ಭಾರೀ ಪೆಟ್ಟು ನೀಡಲಿದೆ ಎಂಬುದರಲ್ಲಿ ಯಾವ ಅನುಮಾನವೂ ಇಲ್ಲ. ಲೇಖಕರ ಬಗ್ಗೆ”