ಬೆಂಗಳೂರಿನ 20 ವರ್ಷಗಳ ಹಳೆಯ ಪೆರಿಫೆರಲ್ ರಿಂಗ್ ರೋಡ್ ಯೋಜನೆಗೆ ಮರುಜೀವ

20 ವರ್ಷದ ಕಾಯುವಿಕೆ ಕೊನೆ; ಬೆಂಗಳೂರು ಪೆರಿಫೆರಲ್‌ ರಿಂಗ್ ರಸ್ತೆ ಯೋಜನೆಗೆ ವೇಗ. ಇರಲಿದೆ ಮೆಟ್ರೋ ಮಾರ್ಗ, 8 ಪಥದ ಎಕ್ಸ್‌ಪ್ರೆಸ್‌ವೇ; ಟ್ರಾಫಿಕ್‌ಗೆ ಸಿಗಲಿದೆ ಮುಕ್ತಿ. 27 ಸಾವಿರ ಕೋಟಿ ರೂ. ಯೋಜನೆ; ಭೂ ಸ್ವಾಧೀನಕ್ಕೆ 20 ಸಾವಿರ ಕೋಟಿ ರೂ. ಬೆಂಗಳೂರಿನ 10 ಜಂಕ್ಷನ್‌ಗಳಲ್ಲಿ ಹಾದು ಹೋಗಲಿದೆ ರಸ್ತೆ. ಪೆರಿಫೆರಲ್ ರಿಂಗ್‌ ರಸ್ತೆ

ಪೆರಿಫೆರಲ್‌ ರಿಂಗ್‌ ರೋಡ್‌ ಯೋಜನೆಗೆ ಮರುಜೀವ ಸಿಕ್ಕಿದೆ. ಬೆಂಗಳೂರು ಬಿಸಿನೆಸ್ ಕಾರಿಡಾರ್ ಎಂದು ಮರುನಾಮಕರಣಗೊಂಡಿರುವ ಯೋಜನೆಯ ನಿರ್ಮಾಣಕ್ಕೆ ವೇಗ ನೀಡಲಾಗಿದೆ. ಪೂರ್ತಿ ಯೋಜನೆಗೆ ಹೊಸ ರೂಪ ನೀಡಲಾಗುತ್ತಿದ್ದು, ಅತ್ಯಾಧುನಿಕ ಫೀಚರ್‌ಗಳನ್ನು ಒಳಗೊಂಡಿರಲಿದೆ. ಪ್ರಮುಖವಾಗಿ ಇದು 8 ಲೇನ್‌ ಎಕ್ಸ್‌ಪ್ರೆಸ್‌ವೇ ಆಗಿರಲಿದ್ದು, ನಗರದ ಆರ್ಥಿಕ ಬೆಳವಣಿಗೆಗೆ ವೇಗ ನೀಡುವ ಒಂದು ಸಮಗ್ರ ಕಾರಿಡಾರ್ ಆಗಲಿದೆ. 2006 ರಲ್ಲಿಯೇ ಬೆಂಗಳೂರು ಪೆರಿಫರೆಲ್ ರಿಂಗ್ ರಸ್ತೆಯ ಮೂಲಕ ನಗರದ ಟ್ರಾಫಿಕ್ ಸಮಸ್ಯೆ ಕಡಿಮೆ ಮಾಡುವ ಈ ಯೋಜನೆ ಘೋಷಣೆಯಾಗಿತ್ತು. ಆದರೆ, 19 ವರ್ಷ ಆದರೂ ಯೋಜನೆ ಕಾರ್ಯರೂಪಕ್ಕೆ ಬಂದಿಲ್ಲ. ಈಗ ಯೋಜನೆ ಬದಲಾಗಿದ್ದು, ಬೆಂಗಳೂರು ಬ್ಯುಸಿನೆಸ್‌ ಕಾರಿಡಾರ್‌ ಎನ್ನುವ ಯೋಜನೆ ಮೂಲಕ ಕಾರ್ಯರೂಪಕ್ಕೆ ಬರುತ್ತಿದೆ.

ಹೊಸ ರೂಪ ಮತ್ತು ಅತ್ಯಾಧುನಿಕ ವೈಶಿಷ್ಟ್ಯದೊಂದಿಗೆ ಈ ಯೋಜನೆ ಅನುಷ್ಠಾನಗೊಳ್ಳುತ್ತಿದ್ದು, ಬಿಬಿಸಿಯ ಚೇರ್‌ಮನ್‌ ಎಲ್‌ಕೆ ಅತೀಕ್‌ ಬಿಗ್‌ ಅಪ್‌ಡೇಟ್‌ಗಳನ್ನು ಹಂಚಿಕೊಂಡಿದ್ದಾರೆ. ಸುಮಾರು 20 ವರ್ಷಗಳಿಂದ ನೆನೆಗುದಿಗೆ ಬಿದ್ದಿದ್ದ 74 ಕಿಲೋಮೀಟರ್ ಉದ್ದದ ಪೆರಿಫೆರಲ್ ರಿಂಗ್ ರೋಡ್ ಯೋಜನೆ ಈಗ ವೇಗ ಪಡೆದುಕೊಂಡಿದೆ. ಭೂಸ್ವಾಧೀನಕ್ಕೆ 21 ಸಾವಿರ ಕೋಟಿ ರೂ. ಅದಲ್ಲದೇ ಈ ಮಾರ್ಗದಲ್ಲಿ ಭವಿಷ್ಯದ ಮೆಟ್ರೋ ಕಾರಿಡಾರ್‌ ಕೂಡ ಇರಲಿದೆ. ಈ ಯೋಜನೆಗೆ ಒಟ್ಟು 2,596 ಎಕರೆ ಜಮೀನು ಬೇಕಾಗಿದೆ.

ಈ ಪೈಕಿ ಕೇವಲ 220 ಎಕರೆ ಮಾತ್ರ ಸರ್ಕಾರಿ ಜಮೀನಾಗಿದ್ದು, ಉಳಿದ ಜಮೀನು ಖಾಸಗಿಯವರದ್ದಾಗಿದೆ. 27 ಸಾವಿರ ಕೋಟಿ ರೂಪಾಯಿ ಯೋಜನೆ ಇದ್ದಾಗಿದ್ದು, ಭೂಸ್ವಾಧೀನಕ್ಕೆ ಸುಮಾರು 21,000 ಕೋಟಿ ರೂ., ಕಾಮಗಾರಿಗಾಗಿ 6,000 ಕೋಟಿ ರೂ. ಮೀಸಲಿಡಲಾಗಿದೆ. ಈ ಯೋಜನೆ ವಿಳಂಬ ಆಗ್ತಿರೋದ್ರಿಂದ ಯೋಜನಾ ವೆಚ್ಚವೂ ಏರಿಕೆ ಕಾಣುತ್ತಲೇ ಇದೆ. ಬಿಸಿನೆಸ್‌ ಕಾರಿಡಾರ್‌ನಲ್ಲಿ ಏನೆಲ್ಲಾ ಇರಲಿದೆ? ಬಿಬಿಸಿ ಚೇರ್‌ಮನ್‌ ಎಲ್‌ಕೆ ಅತೀಕ್ ಅವರ ಪ್ರಕಾರ, ಈ ಯೋಜನೆಯು 8 – ಲೇನ್ ಎಕ್ಸ್‌ಪ್ರೆಸ್‌ವೇಯನ್ನು ಒಳಗೊಂಡಿರುತ್ತದೆ.

ಯೋಜನೆಯ ಒಟ್ಟಾರೆ ರಸ್ತೆ ಅಗಲೀಕರಣಕ್ಕೆ 65 ಮೀಟರ್ ಜಾಗವನ್ನು ಪ್ರಸ್ತಾಪಿಸಲಾಗಿದೆ. ಇದರಲ್ಲಿ, 41 ಮೀಟರ್‌ಗಳಷ್ಟು ಜಾಗವನ್ನು 8 – ಲೇನ್ ಎಕ್ಸ್‌ಪ್ರೆಸ್‌ವೇಗಾಗಿ ಮೀಸಲಿಡಲಾಗುತ್ತದೆ. ಇದರ ಮಧ್ಯದಲ್ಲಿ 5 ಮೀಟರ್‌ಗಳ ಜಾಗವನ್ನು ಭವಿಷ್ಯದ ಮೆಟ್ರೋ ಕಾರಿಡಾರ್‌ಗಾಗಿ ಕಾಯ್ದಿರಿಸಲಾಗಿದೆ. ಎಕ್ಸ್‌ಪ್ರೆಸ್‌ವೇಯ ಎರಡೂ ಬದಿಗಳಲ್ಲಿ ತಲಾ 9 ಮೀಟರ್ ಅಗಲದ ಸರ್ವಿಸ್ ರಸ್ತೆಗಳಿರುತ್ತವೆ. ಈ ಸರ್ವಿಸ್ ರಸ್ತೆಗಳಲ್ಲಿ ಎರಡು ಲೇನ್‌ಗಳು ವಾಹನ ಸಂಚಾರಕ್ಕೆ ಮತ್ತು ಒಂದು ಲೇನ್ ಸೈಕ್ಲಿಂಗ್‌ಗೆ ಮೀಸಲಿಡಲಾಗುತ್ತದೆ.

ಅದಲ್ಲದೇ 3 ಮೀಟರ್‌ ಅಗಲದ ಪಾದಚಾರಿ ಮಾರ್ಗಗಳು ಕೂಡ ಸರ್ವೀಸ್‌ ರೋಡ್‌ನಲ್ಲಿ ಇರಲಿವೆ. ಸರ್ವಿಸ್‌ ರೋಡ್‌, ಎಕ್ಸ್‌ಪ್ರೆಸ್‌ವೇ ಎಲ್ಲದನ್ನೂ ಸೇರಿಸಿದರೆ ಒಟ್ಟು 12 ಪಥಗಳ ರಸ್ತೆ ಬೆಂಗಳೂರು ಬ್ಯುಸಿನೆಸ್‌ ಕಾರಿಡಾರ್‌ನಲ್ಲಿ ನಿರ್ಮಾಣ ಆಗಲಿದೆ. ಭೂಸ್ವಾಧೀನಕ್ಕೆ ವೇಗ ನೀಡಲು 5 ಸೂತ್ರ! ಇನ್ನು, ಕಳೆದ ಎರಡು ದಶಕಗಳಿಂದ ಈ ಯೋಜನೆಗೆ ಪ್ರಮುಖ ಅಡಚಣೆಯೆಂದರೆ ಭೂಸ್ವಾಧೀನ ಪ್ರಕ್ರಿಯೆ. ಆದರೆ, ಈಗ ಈ ಸಮಸ್ಯೆಯನ್ನು ಬಗೆಹರಿಸಲು ಭೂಮಾಲೀಕರಿಗೆ ಐದು ಆಕರ್ಷಕ ಆಯ್ಕೆಗಳನ್ನು ನೀಡಲಾಗಿದೆ.

ಇದರಲ್ಲಿ ಯಾವುದನ್ನೂ ಬೇಕಾದರೂ ಭೂಮಿ ಮಾಲೀಕರು ಆಯ್ಕೆ ಮಾಡಿಕೊಳ್ಳಬಹುದು ಎಂದು ಅತೀಕ್‌ ಹೇಳಿದ್ದಾರೆ. ಅದಲ್ಲದೇ ವಿಶೇಷ ಭೂಸ್ವಾಧೀನಾಧಿಕಾರಿಗಳಿಗೆ ಭೂಮಾಲೀಕರ ಆದ್ಯತೆಗಳನ್ನು ಸಂಗ್ರಹಿಸಿ, ಶೀಘ್ರವಾಗಿ ಪರಿಹಾರವನ್ನು ಫೈನಲ್‌ ಮಾಡಲು ಕೂಡ ಸೂಚನೆ ನೀಡಲಾಗಿದೆ. (ಬಿಡಿಎಯಿಂದ ಪೆರಿಪೆರಲ್‌ ರಿಂಗ್ ರಸ್ತೆ ಭೂಸ್ವಾಧೀನ, ಪರಿಹಾರ ಮಾತುಕತೆ) ನಗದು ಪರಿಹಾರ ನೀಡುವುದು ವರ್ಗಾಯಿಸಬಹುದಾದ ಅಭಿವೃದ್ಧಿ ಹಕ್ಕುಗಳನ್ನು ನೀಡುವುದು ಹೆಚ್ಚುವರಿ ಮಹಡಿ ವಿಸ್ತೀರ್ಣ ಅನುಪಾತ ನೀಡುವುದು ಅಭಿವೃದ್ಧಿಪಡಿಸಿದ ವಸತಿ ಬಡಾವಣೆಗಳಲ್ಲಿ ನಿವೇಶನ ಕಾರಿಡಾರ್ ಬದಿಯಲ್ಲಿ ವಾಣಿಜ್ಯ ಭೂಮಿಯನ್ನು ನೀಡುವುದು.

ಬೆಂಗಳೂರು ಬ್ಯುಸಿನೆಸ್‌ ಕಾರಿಡಾರ್‌ ಮಾರ್ಗ ಹೇಗಿದೆ? 74 ಕಿಮೀ ಉದ್ದದ ಬೆಂಗಳೂರು ಬ್ಯುಸಿನೆಸ್‌ ಕಾರಿಡಾರ್‌, ಪಶ್ಚಿಮದಲ್ಲಿ ತುಮಕೂರು ರಸ್ತೆಯ ಮಾದಾವರ ಬಳಿಯಿರುವ ಬೆಂಗಳೂರು ಅಂತಾರಾಷ್ಟ್ರೀಯ ವಸ್ತುಪ್ರದರ್ಶನ ಕೇಂದ್ರದಿಂದ ಆರಂಭವಾಗುತ್ತದೆ. ಅಲ್ಲಿಂದ ಯಲಹಂಕ ದೊಡ್ಡಬಳ್ಳಾಪುರ ಸಮೀಪದಿಂದ ಬಳ್ಳಾರಿ ರಸ್ತೆಯನ್ನು ಹಾದು, ಹೆಣ್ಣೂರು, ಹಳೆಯ ಮದ್ರಾಸ್ ರಸ್ತೆ ಮೂಲಕ ವೈಟ್‌ಫೀಲ್ಡ್‌, ಚನ್ನಸಂದ್ರ ರಸ್ತೆಯ ಮೂಲಕ ಎಲೆಕ್ಟ್ರಾನಿಕ್ಸ್ ಸಿಟಿಯನ್ನು ಸಂಪರ್ಕಿಸುತ್ತದೆ. ಅಂತಿಮವಾಗಿ, ಹೊಸೂರು ರಸ್ತೆಯ ಜಂಕ್ಷನ್‌ನಲ್ಲಿ ನೈಸ್ ರಸ್ತೆಗೆ ಸೇರಿಕೊಳ್ಳುತ್ತದೆ.

ಇದು ಬೆಂಗಳೂರಿನ ವಾಯುವ್ಯ ಮತ್ತು ಈಶಾನ್ಯ ಭಾಗಗಳನ್ನು ನೇರವಾಗಿ ಡೆವಲಪ್‌ಮೆಂಟ್‌ ಕಾರಿಡಾರ್‌ಗೆ ಜೋಡಿಸುತ್ತದೆ. ಎಲೆಕ್ಟ್ರಾನಿಕ್ಸ್ ಸಿಟಿ ಮತ್ತು ಮಾದಾವರ ಬಳಿಯ ನೈಸ್ ರಸ್ತೆಯೊಂದಿಗೆ ಇದು ಸುಲಭವಾಗಿ ಸೇರಲಿದೆ. ಅದಲ್ಲದೇ, ಭವಿಷ್ಯದಲ್ಲಿ ಪಿಆರ್‌ಆರ್‌-2 ಯೋಜನೆಯೊಂದಿಗೆ ಸಂಪರ್ಕ ಕಲ್ಪಿಸಲು ಮೇಜರ್ ಆರ್ಟೀರಿಯಲ್ ರೋಡ್‌ಗೆ ಒಂದು ಸ್ಪರ್ ರಸ್ತೆಯನ್ನು ನಿರ್ಮಿಸುವ ಯೋಜನೆ ಕೂಡ ಬಿಸಿಸಿಯಲ್ಲಿದೆ.

10 ಪ್ರಮುಖ ಜಂಕ್ಷನ್‌ಗಳಿಗೆ ಸಂಪರ್ಕ! ಈ ಕಾರಿಡಾರ್ ಕೇವಲ ಒಂದು ರಸ್ತೆಯಲ್ಲ, ಬದಲಾಗಿ ಒಂದು ಬೃಹತ್ ಸಂಪರ್ಕ ಜಾಲವಾಗಲಿದೆ. ಇದು 10 ಪ್ರಮುಖ ಜಂಕ್ಷನ್‌ಗಳು ಮತ್ತು 100 ಸಣ್ಣ ಜಂಕ್ಷನ್‌ಗಳನ್ನು ಸಂಪರ್ಕಿಸಲಿದೆ. ಇದರೊಂದಿಗೆ, ವೈಟ್‌ಫೀಲ್ಡ್ ರಸ್ತೆ, ಚನ್ನಸಂದ್ರ ರಸ್ತೆ, ಹೆಸರಘಟ್ಟ ರಸ್ತೆ, ಓಲ್ಡ್‌ ಮದ್ರಾಸ್ ರೋಡ್‌ ಮತ್ತು ಹೊಸೂರು ರಸ್ತೆ ಸೇರಿ 16 ಆಯಕಟ್ಟಿನ ಸ್ಥಳಗಳಲ್ಲಿ ಫ್ಲೈಓವರ್‌ಗಳನ್ನು ನಿರ್ಮಿಸಲಾಗುವುದು.

ಇದಲ್ಲದೆ, 10 ಓವರ್‌ಪಾಸ್‌ಗಳು, 12 ಅಂಡರ್‌ಪಾಸ್‌ಗಳು, ಕ್ಲೋವರ್‌ಲೀಫ್ ಮಾದರಿಯ ಬೃಹತ್ ಮೇಲ್ಸೇತುವೆಗಳು ಮತ್ತು ಚಿಕ್ಕತೋಗೂರು, ಗುಂಜೂರು ಹಾಗೂ ಜಾರಕಬಂಡೆ ಕೆರೆಗಳ ಮೇಲೆ ಸೇತುವೆಗಳನ್ನು ನಿರ್ಮಿಸುವ ಯೋಜನೆ ಕೂಡ ಇದೆ. ಯೋಜನೆಯ ಒಟ್ಟು ಉದ್ದವನ್ನು ಮೂರು ಭಾಗಗಳಾಗಿ ವಿಂಗಡಿಸಲಾಗಿದ್ದು, ಹೊಸೂರು ರಸ್ತೆ ಮತ್ತು ತುಮಕೂರು ರಸ್ತೆ ನಡುವೆ 65.95 ಕಿ.ಮೀ ಒಂದು ಪೇಸ್‌ ಆದ್ರೆ, ಮಾದನಾಯಕನಹಳ್ಳಿ ಬಳಿ 3.4 ಕಿಮೀ ಉದ್ದ ಒಂದು ಪೇಸ್‌ ಆಗಲಿದ್ದು, ಹೆಬ್ಬಗೋಡಿ ಬಳಿ 4.08 ಕಿ.ಮೀ ಕಾರಿಡಾರ್‌ ನಿರ್ಮಾಣ ಆಗಲಿದೆ. ಈ ಮಹತ್ವಾಕಾಂಕ್ಷೆಯ ಬೆಂಗಳೂರು ಬಿಸಿನೆಸ್ ಕಾರಿಡಾರ್ ಯೋಜನೆಯು ನಗರದ ಚಿತ್ರಣವನ್ನೇ ಬದಲಿಸುವ ಸಾಮರ್ಥ್ಯವನ್ನು ಹೊಂದಿದೆ.

ನಗರ ಕೇಂದ್ರದ ಮೂಲಕ ಹಾದುಹೋಗುವ ಭಾರೀ ವಾಹನಗಳನ್ನು ಹೊರವಲಯದಲ್ಲೇ ಬೇರೆಡೆಗೆ ತಿರುಗಿಸುವ ಮೂಲಕ, ಬೆಂಗಳೂರಿನ ಪ್ರಮುಖ ಟ್ರಾಫಿಕ್ ಪಾಯಿಂಟ್‌ಗಳಲ್ಲಿನ ದಟ್ಟಣೆಯನ್ನು ಗಣನೀಯವಾಗಿ ಕಡಿಮೆ ಮಾಡಲಿದೆ. ಈ ಯೋಜನೆ ಬೇಗ ಕಾರ್ಯರೂಪಕ್ಕೆ ಬಂದರೆ ಬೆಂಗಳೂರಿನ ಟ್ರಾಫಿಕ್‌ ಸಮಸ್ಯೆಗೆ ಒಂದಿಷ್ಟು ಪರಿಹಾರ ಸಿಗಬಹುದು”